MDB

Ana səhifə

MDB

Donbassda atəşkəs razılaşmasına baxmayaraq, Debaltsevo ətrafında döyüşlər davam edir

16 fevral 2015 08:08 (UTC +04:00)

APA-nın xəbərinə görə, Ali Radanın üzvü, nüfuzlu hərbi ekspert Dmitri Tımçuk özünün “Facebook” səhifəsində fevralın 15-də Debaltsevo istiqamətində baş verən döyüşlər barədə məlumat verib.

Belə ki, separatçı qruplaşmalar Ukrayna ordusunun Debaltsevo yaxınlığındakı Çernuxino və Novoqriqoryevka kəndlərində yerləşən mövqelərinə hücumlar edərək Ukrayna qüvvələrinin iki blok-postunun mühasirəyə almağa cəhd göstəriblər. Separatçıların 1 tankı minaya düşüb və Ukrayna əsgərləri tərəfindən qumbaraatanla vurulub, 1 piyadaların döyüş maşını (BMP) isə tank əleyhinə idarə olunan raketlə (PTUR) vurularaq ekipajı ilə birlikdə məhv edilib. Separatçılar və Rusiya hərbçiləri daha sonra Ukrayna qoşunlarının mövqelərini artilleriya və reaktiv atəş sistemlərindən atəşə tutublar. Nəticədə Debaltsevo şəhər Milis İdarəsinin binası dağıdılıb. Ölən və yaralanan olmayıb.

Qeyd edək ki, separatçılar Rusiyanın dəstəyi ilə yanvarın ortalarından bəri strateji əhəmiyyətli Debaltsevo şəhərini ələ keçirməyə cəhd göstərirlər. Debaltsevo üç tərəfdən separatçıların mövqeləri ilə əhatə olunub və şəhəri Donbassın Ukraynanın nəzarətindəki digər hissəsi ilə birləşdirən yeganə yol da atəş altındadır. Bu, operativ mühasirə şəraiti kimi qiymətləndirilir. Lakin Ukrayna komandanlığı qrunt yollarla şəhərdəki hərbi kontingentlə əlaqə yarada bilir.