Mədəniyyət siyasəti

Ana səhifə

Mədəniyyət siyasəti

Əbülfəs Qarayev: “Aşıq sənəti UNESCO-nun ya mühafizəyə ehtiyacı olan, ya da nümunəvi sənət siyahısına daxil ediləcək”

12 fevral 2008 14:13 (UTC +04:00)

Bakı. Ülkər Qasımova APA. “Aşıq sənətinin UNESCO-nun mədəni irs siyahısına salınması üçün işlər görülür. Yaxın vaxtlarda çox qədim tarixə malik aşıq sənəti ya mühafizəyə ehtiyacı olan, ya da nümunəvi sənət siyahısına daxil ediləcək”. APA-nın xəbərinə görə, bu sözləri mədəniyyət və turizm naziri Əbülfəs Qarayev bu gün Muzey Mərkəzində “Azərbaycan aşıq sənəti: müasir durumu və inkişaf perspektivləri” mövzusunda keçirilən dəyirmi masada çıxışında deyib. Nazir aşıq sənətinin qorunmasının vacibliyini vurğulayıb: “Heç kəs bizim mədəniyyətimizi, musiqimizi və aşıq sənətimizi mənimsəyə bilməz. Aşıq sənəti məhz Azərbaycanın adı ilə bağlıdır və bunu bütün dünya bilməlidir”. Azərbaycan aşıqlarının 1928-ci ildə keçirilmiş I qurultayının 80 illiyinə həsr olunmuş tədbirdə UNESCO-nun nümayəndəsi Devid Ştel və eksperti Jan Dürinq də iştirak edib. D. Ştel keçirilən tədbiri yüksək qiymətləndirib: “Aşıq sənəti çox güclü sənətdir. İnanıram ki, yaxın müddətdə aşıq sənətinin UNESCO-nun mədəni irs siyahısına salınması məsələsi həll olunacaq və bu dəyərli sənət dünyada tanınacaq”. Azərbaycan Milli Elmlər Akademiyası Dil və Ədəbiyyat İnstitutunun direktor müavini Məhərrəm Qasımlı isə çıxışında Aşıq Ensiklopediyasının hazırlanması təklifini irəli sürüb. Tədbir aşıqların konsert proqramı ilə davam etdirilib.