Media

Ana səhifə

Media

Polis tərəfindən saxlanılmış “Yüksəliş naminə” qəzetinin baş redaktoru və əməkdaşı sərbəst buraxılıb

25 iyun 2007 08:15 (UTC +04:00)

İyunun 22-də polis tərəfindən saxlanılmış Sumqayıtda nəşr olunan “Yüksəliş naminə” qəzetinin baş redaktoru Elçin Məmməd və əməkdaşı Elçin Həsənov həmin gün sərbəst buraxılıblar. Bu barədə APA-ya E. Məmməd məlumat verib. Baş redaktor bildirib ki, polis bölməsində onlardan yazılı izahat alınıb: “İyunun 22-də qəzetdə dərc olunmuş yazı ilə bağlı bizi Sumqayıt Dövlət Universitetinə çağırmışdılar. Universitetdə prorektor Məmməd Əhmədovla görüşdük. Sonra şəhər Polis İdarəsinin 1-ci polis bölməsinin əməkdaşları gəldilər və bizi bölməyə gətirdilər. Bölmədə bizdən universitetə getməyimizin səbəbini soruşdular. İzahat aldıqdan sonra bizi sərbəst buraxdılar. Bildirdilər ki, araşdırmanın nəticəsindən asılı olaraq, bizi yenidən bölməyə çağıracaqlar”. Qeyd edək ki, E. Həsənovun adı xaricdən siyasi sığınacaq almaq üçün müraciət etmiş 24 jurnalistin siyahısında var. /APA/