Media

Ana səhifə

Media

“Gündəlik Azərbaycan” qəzetinin əməkdaşları Söz Azadlığı və Jurnalistlərin Müdafiəsinə Yardım Fondunun ayırdığı maddi yardımdan imtina ediblər

02 iyul 2007 16:07 (UTC +04:00)

“Gündəlik Azərbaycan” qəzetinin bütün əməkdaşları Söz Azadlığı və Jurnalistlərin Müdafiəsinə Yardım Fondunun təzyiqlə üzləşən, həbsdə olan və iş yerlərini itirən jurnalistlərə ayırdığı maddi yardımdan imtina ediblər. Bu barədə APA-ya qəzetin əməkdaşları məlumat verib. Redaksiya əməkdaşları qəzet olaraq yox, ayrı-ayrı əməkdaşlar fonda müraciət edərək yardım istəyiblər. Qəzet üçün ümumilikdə 1000 dollar pulun ayrıldığını deyən əməkdaşlar hər işçiyə 30 dollar pulun düşdüyünü bildirib: “Əslində isə bu məbləğ hər jurnalist üçün 200 dollar olmalı idi. Biz fondun bu cür seçimindən inciməsək də, həmin məbləği götürməkdən imtina edirik. Bu, bütün kollektivin qərarıdır”. Qeyd edək ki, sözügedən fond həbsdə olan “Azadlıq” qəzetinin əməkdaşı Mirzə Sakitin, “Müxalifət” qəzetinin baş redaktoru Rövşən Kəbirlinin, “Sənət” qəzetinin baş redaktoru Samir Sədaqətoğlunun, “Sənət qəzeti”nin əməkdaşı Rafiq Tağının ailəsinə 350, “Müxalifət” qəzetinin şöbə müdiri Yaşar Ağazadənin ailəsinə isə 250 dollar verilməsi barədə qərar qəbul edib. Peşə borcunu yerinə yetirərkən xəsarət alan “Azadlıq” qəzetinin əməkdaşı Fikrət Hüseynlinin, Nicat Dağların, “Yeni Müsavat” qəzetinin əməkdaşı Etibar Seyidağanın hər birinə 100, “Gündəlik Azərbaycan” qəzetinin redaktoru Üzeyir Cəfərova isə 150 dollar verilməsi nəzərdə tutulub. Fəaliyyətini dayandıran “Realnıy Azerbaydjan” qəzetinin əməkdaşı Çingiz Sultansoya 100, “Gündəlik Azərbaycan” qəzetinin işlə təmin olunmayan əməkdaşlarına birdəfəlik 1000 dollar həcmində yardım edilməsi qərara alınıb. 10 min dollar həcmində maliyyə vəsaiti Açıq Cəmiyyət İnstitutu - Yardım Fondu tərəfindən ayrılıb. /APA/