Media

Media

Mais Məmmədov: “Yenidən bu ömrü yaşamağa hazıram”

17 iyul 2007 09:42 (UTC +04:00)

ANS Şirkətlər Qrupunun prezidentinin müşaviri Mais Məmmədovun APA-ya müsahibəsi

- Bu günlərdə 69 yaşınızı qeyd etdiniz. Bu yaşın ovqatı necədir?
- Məşhur bir rus mahnısı var, “Den rojdeniye qrustnıy prazdnik”. Əvvəllər bu mahnını eşidəndə təəccübləndirdim ki, niyə məhz kədərli bayram? İndi hər şeyi başa düşürəm. Artıq ömür azalır. Müəyyən yaşa kimi ümidlə yaşayırsan, fikirləşirsən ki, vaxt gələcək, hər şey olacaq. Amma zaman keçir və başa düşürsən ki, heç nə olmayacaq. Əslində, deyə bilmərəm ki, bu mənim üçün qara bayramdır.
- Yaşadığınız ömürdən razısınız?
- Əlbəttə razıyam. Mən yenidən bu ömrü yaşamağa hazıram. Həyatda çox çətinliklərim olub. Heç vaxt ağlıma gəlməzdi ki, atəş altına düşə bilərəm. Müharibə vaxtı jurnalist kimi Qarabağda olmuşam. Bir dəfə operatorum Nadir Zeynalovla məni ermənilər atəşə tutmuşdular. Sonra Nadir atəş zolağından çıxdı, mən qaldım. Qarabağda burnumla özümə səngər qazmışam. Ancaq bunların heç biri ilə öyünmürəm. Hesab edirəm ki, bu mənim borcum olub. Ancaq hərdən yanıb tökülürəm ki, bu ölkədə cəmi iki sevimli sənət var - biri sürücülük, digəri isə alverçilikdir. Bakının bütün binalarının zirzəmiləri ya dükan, ya kababxana, bütün küçələri isə taksilərdir. Hər binanın tinində iyirmi taksi dayanır. Bununla ölkəni qaldırmaq olmaz axı...
- Uzun illərdir, ANS-də çalışırsınız. Buradakı fəaliyyətiniz haqqında nə deyə bilərsiniz?
- Nə mən ANS-i, nə də ANS məni heç vaxt unutmayıb. Səhhətimdə ciddi problemlərin yaramasına baxmayaraq həmişə bu televiziyada işləmişəm. Ad günümdə bütün ANS-çilər mənə zəng vurub təbrik etdilər.
- İndi çoxları elə fikirləşir ki, ANS əvvəlki deyil...
- Hər kəsin öz fikri var. Bizdə əsas proqram xəbərlərdir. Ola bilsin ki, ANS-də cürbəcür şoular yoxdur. Yeni mövsümdən ANS-dəki yeniliklərin şahidi olacaqsınız. Mən bilirəm ki, ölkədə insanlar xəbəri ANS-dən izləyir. Mən bununla fəxr edirəm.
- ANS fəaliyyətini bərpa edəndən sonra televiziyaya xüsusi nəzarətçinin təyin olunduğu söylənilir...
- ANS-də nəzarətçi yoxdur, bu şayiədir. Kim istəyir, buyurub, gəlib baxa bilər. Siz ANS-dən başqa hansı televiziya kanalında müxalifət liderini görə bilərsiniz? Ölkədə mitinqlər olanda ANS-dən başqa kim işıqlandırır? Biz çalışırıq ki, hər iki tərəfin mövqeyini işıqlandıraq. Biz işləyirik. Hansı televiziyada “İç xəbər” kimi proqram var? Hər həftə ölkənin müxtəlif regionundan yüzlərlə məktub alırıq.
- ANS bağlananda cəmiyyətin reaksiyası Sizi qane etdimi?
- Bəziləri hətta deyirdi ki, gəlin küçəyə çıxıb mitinq edək. Biz razı olmadıq. Başa düşürdük ki, mitinq bizə yox, bəzi siyasi qüvvələrə lazımdır. Azərbaycan prezidenti İlham Əliyev müsahibəsində ANS televiziyasına dəfələrlə dayaq olduğunu söylədi. Heydər Əliyev birinci dəfə Klivlend xəstəxanasında olanda hamıdan qabaq Mir Şahinə zəng vurub danışdı, səhhətinin yaxşı olması barəsində Azərbaycan xalqına məlumat çatdırmasını istədi və yaxın günlərdə vətənə dönəcəyini bildirdi. Niyə Heydər Əliyev başqa televiziyalara zəng etməmişdi? O, bilirdi ki, informasiya kanalı ANS-dir. Televiziyamızın bağlanması bir tərəfdən pis olsa da, digər tərəfdən kimin-kim olduğunu bizə tanıtdı. Gördük ki, kim dostdur, kim fırıldaq... O boyda Milli Məclisdən cəmi 25 adam imza atdı bizim müraciətimizə. Əvvəl hamısı dost idilər axı... Nə isə çox şeylər var, amma qoy qalsın. Bizə dəstək verənlər də az olmadı. Prezident İlham Əliyev, Mehriban Əliyeva, Hacı Allahşükür Paşazadə, Oqtay Mirqasımov, Fərhad Xəlilov və digər insanların bizə qarşı müsbət reaksiyasını gördük. Biz ANS-in tarixini mütləq yazmalıyıq. Heç kim deyə bilməz ki, bizə nəsə verib. 16 ildir ki, bizim binamız yoxdur, bütün yerlər icarəyə götürülüb. Bəzi mətbuat orqanları da bizə dəstək oldu. Amma elə insanlar da var ki, bizim haqqımızda olmazın böhtanlar söyləyirdi. Çingiz Mustafayevin Xəzərdəki neft yataqlarının yerini göstərən xəritəni bp-yə sataraq 20 milyon pul aldığını, bu pulla da ANS-i açıldığını yazırdılar. Belə yalan olmaz axı... Mənin Eynulla Fətullayevə yazığım gəlir, Allah ona kömək olsun. Sən axı mikrofon deyilsən, jurnalistsən, fikirləşməlisən. Bu reketlikdir, kimlərsə nə isə qazanmaq istəyirlər. Soruşun görək, indiyə kimi ANS-də bir nəfər rüşvət alıb? Vahid Mustafayev sutkada 48 saat işləmək istəyir.
- Sizcə, Azərbaycan jurnalistikasında nə çatışmır?
- Ali məktəbi bitirib ANS-ə işləməyə gələn gənc jurnalistlər heç nə bilmirlər. Sabah institutu bitirib ANS-ə işləməyə gələn şəxsi işə götürə bilmərik. Ona görə də, ANS-də kurslar açmışıq. Məsələn, ali məktəblərdə prodüserlər hazırlanmalıdır. Lazımdırsa, xaricdən mütəxəssislər çağırmaq lazımdır. Televiziyanın işi çox çətindir, peşəkar texniki işçilər demək olar ki, tapılmır. Jurnalistika fakültələrinin isə proqramı tamamı ilə dəyişdirilməlidir. Belə proqramla işləmək olmaz.
- Təqaüdə niyə çıxmırsınız?
- Mən uzaqbaşı on gün dincələ bilərəm. On gündən sonra üzümü taraş edib, ağ köynək geyinib işə çıxmasam, Aşqabad batan kimi bataram. Məni iş saxlayır. Ömrümün sonuna kimi işləmək fikrindəyəm. /APA/