Media

Ana səhifə

Media

“Senzornamə” filminin təqdimat mərasimi keçirilib

18 iyul 2007 12:28 (UTC +04:00)

Söz Azadlığını Müdafiə Fondunun (SAMF) və VVS şirkətinin Böyük Britaniyanın Azərbaycandakı səfirliyinin maliyyə dəstəyi əsasında çəkilən “Senzornamə” filminin təqdimat mərasimi keçirilib. APA-nın məlumatına görə, SAMF-ın nümayəndəsi Məmməd Nazimoğlu çıxış edərək, hər il Milli Mətbuat Günü ərəfəsində müxtəlif layihələrlə çıxış etdiklərini deyib. O, “Senzornamə” filmində müsbət və mənfi məqamların olduğunu, filmin müəyyən müzakirələrə səbəb olacağını istisna etmədiyini vurğulayıb. M. Nazimoğlu filmin ideyasını onlara Milli Elmlər Akademiyasının işçiləri tərəfindən verildiyini qeyd edib: “Akademiyanın işçisi Elmira xanım arxivdə işləyərkən Çar Rusiyası dövründə Qafqaz Senzura Komitəsində 13 il baş senzor işləmiş azərbaycanlı senzor Şərif Mirzəyevin gündəliyini tapıb. Həmin gündəlikdə faktlar və xatirələr belə bir filmin çəkilməsi ideyasını ortaya çıxardı”. Fondun direktoru, şair Musa Yaqub sovet dövründə mövcud olan senzura haqda fikrini bildirib. O, jurnalistlərin daxili senzurasının olmasını vacib sayıb. Çıxışlardan sonra film nümayiş olunub. Filmdə Şərif Mirzəyevin xatirələrinə, sovet dövründə “Qlavlit”in əsasnaməsinə toxunulub, senzor işləmiş şəxsin fikirləri yer alıb. /APA/