Media

Media

Arif Alışanov: “Az.TV-nin nəzdində yeni struktur yaradılır”

15 avqust 2007 13:10 (UTC +04:00)

“Azərbaycan Televiziya və Radio Verilişləri” Qapalı Səhmdar Cəmiyyətinə rəhbərlik etməyinizin bir ili tamam olur. Bu müddətdə Az.TV-də nələr dəyişdi?
Bu vəzifəyə prezidentin sərəncamı ilə təyin edilmişəm. Mənim fəaliyyətimə ölkə başçısı, kollektiv və ictimaiyyət qiymət verə bilər. Onu deyim ki, prezidentin “Azərbaycan Televiziya və Radio Verilişləri” Qapalı Səhmdar Cəmiyyətinin rəhbərliyinə burada uzun müddət çalışmış şəxsi təyin etməsi minnətdarlıqla qarşılandı. Məhz AzTV-də yetişmiş şəxs onun bütün problemlərinə dərindən bələd olub, həll etməyə qadirdir.
Ötən il ərzində efir-yaradıcılıq, istehsalat və texniki sahələrdə bir sıra islahatlar həyata keçirilib. Əsasən efirin keyfiyyət baxımından dəyişməsinə nail olmuşuq. Zəif verilişlərin efirə verilməməsi üçün efirqabağı verilişlərə qəbul komissiyası yaratdıq. Komissiya yalnız yaradıcılıq standartlarına və texniki parametrlərə uyğun verilişlərə müsbət rəy verir. 1992-ci ildən sonra ilk dəfə olaraq telekanala gənc aparıcılar və reportyorlar cəlb etmək üçün müsabiqə keçirdik. Həmin müsabiqədə iştirak edən 500 nəfərdən 30-u seçildi. Onlar müxtəlif redaksiyalarda iş təcrübəsi keçəndən sonra daha bir seçim oldu. İndi həmin jurnalistlər “Xəbərlər”, “Səhər” və digər ictimai-siyasi proqramlarda çalışırlar.

- Sizcə, AZ.TV-də islahatlar apara bildinizmi?
- Elə birinci gündən islahatlar aparılır və aparılacaq. Mən AzTV-yə sədr təyin olunanda açıq şəkildə bildirmişdim ki, kadr seçimində yalnız peşəkarlığa və dövlətçiliyə sadiqliyə üstünlük veriləcək. Şəxsən məni televiziyada çalışanların irqi, dini, dili, doğulduğu yer maraqlandırmır. Yaxın zamanda atılacaq addımları indidən açıqlamaq istəmirəm. Biz istehsalat, kadr sahələrində islahatlar aparırıq və bu proses davam edəcək.

Bir il ərzində AzTV-də və radioda xeyli kadr dəyişikliyi aparılıb. Bununla bağlı konkret rəqəm söyləmək mümkündürmü?
Kadrların 50 faizi yenilənib, amma bu rəqəmi 6070 faizə çatdırmaq niyyətimiz var. Amma biz bu prosesdə uzun illər Azərbaycan televiziyasında çalışan peşəkar əməkdaşlarımızdan imtina etmək fikrində deyilik. Yaşlı olmalarına baxmayaraq, onların bir çoxu bacarıqlı və istedadlı insanlardır. Onların arasından hazırda müqavilə əsasında Azərbaycan televiziyasında çalışanlar var.

Bir qədər əvvəl AzTV-yə gələn bir sıra kadrlar sonradan burdan uzaqlaşdılar...
Bu, istehsalat prosesidir. Televiziyaya gələn yeni kadrın 1-2 ay çalışandan sonra işdən getməsində təəccüblü heç nə yoxdur. Burada heç bir siyasi ambisiya və ya şəxsi motivlərdən söhbət gedÓ™ bilməz. Dəvət edilən kadrlar gəlib işləyir, müəyyən vaxtdan sonra ya onun işi rəhbərliyi qane etmir, ya da ki, iş həmin şəxsi qane etmir.

Hazırda Az.TV-nin Rusiya ərazisində yayımlanması məsələsi iki ölkə arasında danışıqlar mövzusudur. Rusiyada yayımlanmaq üçün AzTV-nin nəzdində yeni kanalın yaradılması nəzərdə tutulur. Bu yöndə hazırlıqlar başlanıbmı?

Əvvəla, biz AzTV-nin nəzdində yeni struktur yaratmağa hazırlaşırıq. Artıq müəyyən işlər görülüb. Əgər AzTV-nin Rusiya ərazisində yayımlanması müsbət həll olunarsa, biz çox qısa vaxtda proqramlarımızı nümayiş etdirə biləcəyik. Rusiyaya hər gün 24 saat, o cümlədən 7 saat rusca verilişlər yayımlamağı nəzərdə tutmuşuq.

- Başqa ölkələrdə də analoji addım atılması mümkündürmü?
- Bu məsələ dövlətlərarası sazişlərlə tənzimlənir. Amma lazım gələrsə, Azərbaycan televiziyası öz verilişlərini bir neçə dildə yayımlaya bilər. /APA/