Media

Media

“Day.az”ın baş redaktoru Elnur Baimov: “Keçdiyimiz yoldan çox razıyam”

03 sentyabr 2007 14:54 (UTC +04:00)

- “Day.az” 4 ildə qarşısına qoyduğu məqsədə nail ola bilib?
- Keçdiyimiz yoldan çox razıyam. Təbii ki, bu razılıq fəaliyyət göstərdiyimiz 4 ildə əldə olunan nəticələrlə bağlıdır. Biz qarşıya qoyduğumuz məqsədə çatmışıq, amma nail olduqlarımızla kifayətlənmirik. Daha da irəli getməyə çalışırıq və bunun üçün yeni layihələr işləyirik.
- “Day.az” Azərbaycan dilində fəaliyyət göstərsəydi, indiki populyarlığı qazana bilərdinizmi?
- Azərbaycan müstəqillik əldə edəndən sonra yetişən nəsil həm orta, həm də ali məktəbi ana dilində bitirsələr də, onlar xəbərləri rus dilində oxuyurlar. Bu, ziddiyyətli haldır, amma reallıqdır. Azərbaycanda rus dilli qəzetlər də daha çox oxunur. Mənim proqnozlarıma görə, hələ 5-10 il arası vəziyyət belə davam edəcək. Xəbər bazarında rus dilində məhsullara daha çox təlabat olacaq. Mən etiraf edirəm ki, biz xəbərlərimizi Azərbaycan dilində yayımlasaydıq, bu qədər müvəffəqiyyət əldə edə bilməzdik.
- Oxucularınızın təxmini sayı nə qədərdir?
- Bizi adi xəbər günündə sutkada təxminən 27 min adam oxuyur. Xəbər günü zəngin olanda, mühüm hadisə baş verəndə isə oxucularımızın sayı qat-qat artır. Məsələn, bu günlərdə Bakının mərkəzində hündür mərtəbəli binanın uçması xəbəri ilə bağlı bizim məlumatları oxuyanların sayı 35 minə çatıb. Seçkilər ərəfəsində isə oxucuların sayı daha çox olur.
- “Day.az”ın daha çox informasiya agentliklərinə istinad etməsinin səbəbi nədir?
- Biz gün ərzində çoxsaylı xəbərlər yayımlayırıq. Abunə olduğumuz informasiya agentliklərinin xəbərlərindən istifadə etməyimiz işçilərimizin sayının az olması ilə bağlı deyil. Sadəcə, yayımlanan xəbərlərimizin sayı çox olduğu üçün başqa agentliklərə, hətta qəzetlərə müraciət edirik. Bu, bizim Azərbaycanda tətbiq etdiyimiz yeni modeldir. Vacib olan bütün xəbərləri oxucularımıza çatdırmaq istəyirik. Oxucuya maraqlı olan xəbərdir, onun mənbəyi ilə əməkdaşlıq etmək bizim işimizdir. Dünyanın bütün informasiya portalları agentliklərin xidmətindən istifadə edirlər.
- “Day.az” saytını həmişə “Anar Məmmədxanovun saytı” kimi təqdim edirlər. Sizcə, niyə belədir?
- Anar Məmmədxanov “Day.az”ın təsisçisidir. Bu təqdimatın da səbəbi yəqin ki, budur. Anar Məmmədxanov bu dörd ildə bizim komandanın aktiv üzvü olub, bütün strateji məsələlər həll olunan zaman o, bizimlə birgə olub. Amma Anar Məmmədxanov “Day.az”ın operativ idarəetməsinə heç zaman qoşulmayıb.
- “Day.az”ın internet radiosunun fəaliyyəti ilə bağlı yaranmış maneənin aradan qaldırılması istiqamətində hansı iş gedir?
- “Day.az” internet radiosu fəaliyyətə başlayan kimi bəzi dövlət qurumlarının konservativ nümayəndələri Azərbaycanda internetin bu cür inkişafından narahat olub, radiomuza qarşı müxtəlif iradlar bildirdilər. Nəticədə radiomuzun inkişafı dayandı. Amma indiki halda radio fəaliyyət göstərir və on minlərlə dinləyicisi var. Bu yaxınlarda video xəbərlər yaymağa başlamışıq. İndi video studiyanın quraşdırılması ilə məşğuluq. Bu başa çatandan sonra saytda 5 dəqiqəlik debatları oxuculara təqdim edəcəyik. Texnologiyamız bizə video görüntüləri kiçik ölçüdə yaymağa imkan verir. Biz bu görüntüləri elə yerləşdirəcəyik ki, hətta az sürətli internetdən istifadə edən oxucularımız belə video görüntüləri seyr edə biləcəklər. Məncə, biz bununla ənənəvi televiziyaya alternativ televiziya yaradacağıq. Bunun çox böyük perspektivləri olduğuna da şübhəm yoxdu. Amma buna bəzi mühafizəkar dövlət məmurlarının necə reaksiya verəcəyi hələ mənə bəlli deyil. Əslində biz çoxdan “Day.az” internet televiziyasını aça bilərdik. Amma Azərbaycanda istifadəçidə olan internetin sürəti hələlik buna imkan vermir. Buna görə də indilik “Day.az” sadəcə, video görüntülər yayacaq. Bizim həmişə ənənəvi radio, televiziya açmaq arzumuz olub. Bu bazarda çoxlu görülməli işlər var. Amma hələlik buna imkan yoxdur. Ümumiyyətlə isə mən internetin çox parlaq sabahı olacağına inanan adamlardanam və bu sahədə də daha çox layihələr həyata keçirmək istəyirəm.
- “Day.az”ın Azərbaycan dili versiyasını yaratmağı düşünmürsünüz?
- Təəssüf ki, internetdən Azərbaycan dilində xəbər oxunması o qədər də populyar deyil. Amma buna baxmayaraq, bu ilin axırına kimi, “Day.az”ın Azərbaycan dili versiyasını bərpa edəcəyik. /APA/