Media

Ana səhifə

Media

Demokratik Jurnalistlər Liqası iyul ayı üçün keçirdiyi monitorinqin nəticələrini açıqlayıb

06 sentyabr 2007 13:53 (UTC +04:00)

Demokratik Jurnalistlər Liqası (DJL) Açıq Cəmiyyət İnstitutu - Yardım Fondunun maliyyə dəstəyi ilə həyata keçirdiyi “Media problemlərinin monitorinqi, jurnalistlərə hüquqi və maddi yardım” adlı layihə çərçivəsində 2007-ci ilin iyul ayı üçün söz və mətbuat azadlığı sahəsindəki vəziyyətlə bağlı keçirdiyi monitorinqin nəticələrini açıqlayıb. DJL-dən APA-ya verilən məlumata görə, söz və mətbuat azadlığı sahəsində vəziyyətlə bağlı monitorinqin yekununda 88 fakt öz əksini tapıb. Bu sırada “Bizim yol” qəzetinin əməkdaşı Müşfiq Hüseynovun həbsi, “Nota Bene” qəzetinin əməkdaşı Fərəməz Novruzoğlunun iyulun 19-da dodaqlarını tikərək aclıq aksiyası keçirməsi, Respublika Prokurorluğunun Korrupsiyaya Qarşı Mübarizə İdarəsi əməkdaşlarının “Bizim yol” qəzetinin ofisinə gələrək qəzetin maliyyə sənədlərini götürməsi, “Yeni Müsavat” qəzetinin Naxçıvan üzrə müxbiri Məmmədqulu Əliyevin bir neçə saat Şahbuz rayon Polis Şöbəsində saxlanılması, Apellyasiya Məhkəməsinin “Müxalifət” qəzetinin baş redaktoru Rövşən Kəbirli və qəzetin əməkdaşı Yaşar Ağazadə barəsində Yasamal rayon Məhkəməsinin hökmünü qüvvədə saxlaması, Ali Məhkəmənin “Gündəlik Azərbaycan” və “Realnıy Azerbaydjan” qəzetlərinin 20 min manat cərimələnməsi və baş redaktor Eynulla Fətullayevin 2 il 6 ay müddətinə azadlıqdan məhrum edilməsi ilə bağlı qərarı qüvvədə saxlaması, “Zerkalo” qəzetinin baş redaktoru Elçin Şıxlının və qəzetin əməkdaşlarının Milli Təhlükəsizlik Nazirliyində dindirilməsi və s. faktlar da göstərilib. /APA/