Media

Media

Ədliyyə Nazirliyinin Müalicə Müəssisəsinin baş həkimi: “Mirzə Sakitin aclıq etməsi barədə verilən məlumatların əsası yoxdur”

21 sentyabr 2007 08:52 (UTC +04:00)

Hazırda Ədliyyə Nazirliyinin Müalicə Müəssisəsində saxlanılan “Azadlıq” qəzetinin əməkdaşı Mirzə Sakit dünəndən başladığı aclıq aksiyasını davam etdirir. Bu barədə APA-ya açıqlamasında məhbusun qardaşı, “Azadlıq” qəzetinin baş redaktoru Qənimət Zahid bildirib. Onun sözlərinə görə, Mirzə Sakit yenidən 14 saylı Cəzaçəkmə Müəssisəsinə köçürülməsinə etiraz edir. Q. Zahid deyib ki, qardaşını bu günlərdə həbsxanaya köçürəcəklər.
Qeyd edək ki, məhbus 14 saylı Cəzaçəkmə Müəssisəsinin ailəsinin yaşadığı ünvandan uzaqda yerləşdiyini nəzərə alaraq, şəhərə yaxın həbsxanalardan birinə köçürülməsi xahişi ilə Ədliyyə Nazirliyinin Penitensiar Xidmətinə müraciət edib. Q. Zahidin sözlərinə görə, bu müraciət nəzərə alınmayıb.
Ədliyyə Nazirliyinin Müalicə Müəssisəsinin baş həkimi Rəşad Dəmirov isə APA-ya açıqlamasında Mirzə Sakitin aclığa başlaması barədə yayılan məlumatı təkzib edib. O deyib ki, məhbus aclığa başlamaq barədə ərizə yazmayıb: “Bu gün həkimlər ona baş çəkib. Sakit Zahidov aclıq etmir”. Baş həkim onun müalicəsinin başa çatdığının, səhhətinin isə yaxşı olduğunu deyib.
Ədliyyə Nazirliyinin Penitensiar Xidmətin ictimaiyyətlə əlaqələr şöbəsindən də APA-ya bildirilib ki, Mirzə Sakit aclıq etmir. Qeyd olunub ki, Mirzə Sakitin ailəsinin yaşadığı ünvana yaxın cəzaçəkmə müəssisəsinə köçürülməsi barədə müraciət Penitensiar Xidmətdə müzakirə olunur. /APA/