Media

Ana səhifə

Media

“Ekspress” qəzeti: “Beynəlxalq Nüvə Energetikası Agentliyinin Azərbaycanda ilk nüvə reaktoru layihəsinin inşasına icazə verib”

05 oktyabr 2007 11:18 (UTC +04:00)

“Azərbaycan” qəzeti prezident İlham Əliyevin Ramazan ayı münasibətilə Şeyxülislam Hacı Allahşükür Paşazadənin açdığı iftar süfrəsində çıxış edib. Ölkə başçısı çıxışında Azərbaycanda dini tolerantlıq var, yəhudi, xristian, o cümlədən katoliklər yüksək fəaliyyət göstərib, öz ibadətləri ilə məşğul ola bilirlər: ” ...Mən əziz şeyx həzrətlərinə bir daha öz məhəbbət duyğularımı bildirmək istəyirəm. O, bu gün ulu öndər haqqında danışdı. O da sirr deyil ki, məhz Heydər Əliyevlə şeyx həzrətlərinin dostluğu Azərbaycanda bu dini tolerantlığın inkişafına çox böyük təkan vermişdir. Onların dostluğu, onların arasında olan səmimi münasibət bütün cəmiyyətə öz müsbət təsirini göstəribdir. Bizim aramızda da dostluq var və bu indi yaranmayıbdır. Mən Prezident olandan əvvəl yaranıbdır. Hətta yadımdadır ki, hələ Prezident seçilməmişdən burada buna bənzər bir məclisdə olmuşdum. Mən Prezident seçiləndən sonra Şeyx həzrətləri dedi ki, Siz Prezidentsiniz, yəqin gəlməzsiniz. Dedim ki, bizim dostluğumuzda heç nə dəyişməmişdir. Prezident müvəqqəti bir vəzifədir, bir müddət var, ondan sonra yoxdur. Ancaq insani münasibətlər əbədidir, dostluq əbədidir. Biləndə ki, bu dostluq ölkəmizin mənafeyinə xidmət edir, mən daha da çox sevinirəm.”
Qəzetdə həmçinin millət vəkili, İsa Həbibbəylinin “Dahilik divana çəkilməz” yazısında son zamanlar ANS-də efirə çıxan “Dahilərin divanı” verilişi ilə bağlı ciddi tənqidi yazısı dərc olunub.
“Xalq qəzeti”ində 1994-cü ilin oktyabr hadisələri, dövlət çevirilişinə cəhd, Bakı-Tbilisi-Ceyhan kəmərinin işə düşməsindən narahat olan xarici qüvvələrin həyata keçirmək istədikləri məkrli niyyətlər və digər proseslər haqqında geniş material verilir.
“Respublika” qəzeti də Azərbaycanın mədəni irsinin hədəfə alınması və ölkəyə qarşı aparılan mənəvi müharibə ilə bağlı yazı dərc edib.
“Yeni Müsavat” qəzeti Azərbaycan XİN-in rəhbəri E. Məmmədyarovun ABŞ-da İran məsələsi ətrafında danışıqlarda iştirak etdiyini və ABŞ-ın rəsmi Bakıdan İrana qarşı əməliyyatlarda dəstək istəməsini yazıb. Rusiya mənbələrinə istinadən qeyd olunub ki, Amerika tərəfi Azərbaycanı razı salmağa çalışır.
“Azadlıq” qəzeti isə Binəqədi polisinin dələduzluqda ittiham etdiyi Taleyə Məmmədovanın özünü kişi kimi, Taleh adıyla, təqdim edərək 157.500 dollar pulu necə qazanması ilə bağlı faktı araşdırıb. Digər bir yazıda Nərimanov rayonu ərazisində yerləşən və hazırda bir hissəsi köçürülməkdə olan xristian qəbirstanlığı ətrafında baş verənlər araşdırılıb. Qəzet həmçinin xaricdə, o cümlədən Rusiyada fəaliyyət göstərən Azərbaycan diaspor təşkilatlarının fəaliyyəti ilə bağlı araşdırma dərc olunub. Həmin təşkilatların ölkənin maraqları üçün deyil, ayrı-ayrı şəxslər üçün fəaliyyət göstərdiyi qeyd olunan yazıda diaspor qurumlarının fəaliyyəti tənqid olunub.
“Bakı Xəbər” qəzeti cəmiyyətin “maliyyə amnistiyası”na hazır olub olmaması sualına cavab axtarmağa çalışıb. Bununla bağlı Milli Məclisin iqtisadi siyasət daimi komissiyasının üzvü Vahid Əhmədovun fikirlərinə geniş yer verilib: “...Nə qədər ki, gəlir deklarasiyası haqda qanun qəbul edilməyib, onun həyata keçirilməsi mexanizmi işlənməyib, maliyyə amnistiyasından danışmaq tezdir. Bunun üçün mütləq çox yüksək səviyyədə şəffaflıq mühiti yaradılmalıdır”¦” Eyni zamanda, qəzetdə müxalifətin yenidən ortaq məxrəcə gəlməyə çalışması ilə bağlı material əksini tapıb.
“Zerkalo” qəzeti Ermənistan-Azərbaycan münaqişəsinin BMT Baş Assambleyasında müzakirəsi və həmin müzakirələrin nəticələri ilə bağlı geniş araşdırma təqdim edir. Qəzet, Ermənistan xarici işlər naziri Vardan Oskanyanın Qarabağ münaqişəsinin “donunu açmağa” çalışdığını yazır.
Eyni zamanda qəzet, Türkiyə şirkətlərinin inşa edəcəyi 50-dək kiçik və orta güclü hidroelektrik stansiyaları və onların regionda bu sahədəki gərginliyə, ölkənin enerji sisteminə təsiri ilə bağlı araşdırma təqdim edib.
“Ekspress” qəzetində Beynəlxalq Nüvə Energetikası Agentliyinin Azərbaycanda ilk nüvə reaktoru layihəsinin inşasına icazə verməsi ilə bağlı araşdırma dərc olunub. Qəzetin öz mənbələrinə istinadən verdiyi məlumata görə, hazırda layihənin gerçəkləşdirilməsi istiqamətində ciddi iş gedir. Azərbaycanda AES-in tikilməsi planlarına qonşu Gürcüstan və Türkiyənin də dəstək verdiyi bildirilir.
“525-ci qəzet”də Ermənistanda keçiriləcək prezident seçkiləri ərəfəsində ictimai-siyasi durum şərh olunub. Qərb və Rusiyayönlü namizədlərin şansları dəyərləndirilib. Seçkilərdə Qərbin böyük ehtimalla Artur Baqdasaryan və Stepan Dəmirçiyana, Rusiyanın isə Serj Sərkisyana dəstək verəcəyi qeyd olunub.
“Exo” qəzeti MDB dövlət başçılarının Tacikistanın paytaxtı Düşənbədə bu gün keçiriləcək sammiti ilə bağlı proqnozlar verib.
“Gün Səhər” qəzeti Gürcüstana satılan Azərbaycan qazının qiymətinin artırılması istiqamətində son zamanlar intensiv xarakter alan məlumatları təhlil edib. Qəzet qazın qiymətinin artırılması ideyasının arxasında Rusiyanın dayandığını iddia edən bəzi mütəxəssislərin haqlı olmasının mümkünlüyünü ifadə edib. Yazıda Ukrayna, Gürcüstan, Rusiya, Azərbaycan, ABŞ da daxil olmaqla baş verən hadisələrin bir çox ölkələrin marağında olduğu qeyd olunur.