Media

Ana səhifə

Media

Naxçıvan Mətbuat Şurası “Yeni Müsavat” qəzetinin bölgə müxbiri Həkimeldostu Mehdiyevin həbsi ilə bağlı bəyanat yayıb

11 oktyabr 2007 12:46 (UTC +04:00)

Şuradan APA-ya daxil olan müraciətdə söz və mətbuat azadlığının hər kəsin hüquq və azadlıqlarının tanınması, qanunlara, mental dəyərlərə hörmət prinsipini ehtiva etdiyi vurğulanıb: “Amma təəssüf ki, hələ də bir çoxları bunu böhtan atmaq, qarayaxma, yalanları cəmiyyətə təlqin etmək azadlığı kimi başa düşürlər”.
“Yeni Müsavat” qəzetinin əməkdaşı kimi təqdim edilən Həkimeldostu Mehdiyevin jurnalist kimi fəaliyyət göstərmədiyi vurğulanan bəyanatda buna təsdiq kimi qəzetin onun “hansı saylı jurnalist vəsiqəsini daşıdığını, vəsiqəni nə vaxt aldığını, hansı saylı əmrlə redaksiya ştatına götürüldüyünü, onunla əmək müqaviləsi, yaxud digər müqavilə bağlanması barədə məlumat verilməməsi, eyni zamanda qəzetdə heç vaxt Mehdiyevin imzasına rast gəlinməməsi” göstərilib.
Daha sonra bəyanatda H. Mehdiyevin bir neçə dəfə həbs olunduğu vurğulanıb: “O, 1993-cü ildə keçirilən referendum zamanı qanunsuz saxladığı silahla seçki məntəqəsinə girib, havaya atəş açaraq seçkiləri pozmağa cəhd göstərib, həmin zaman məntəqə ərazisində olan o vaxt ədliyyə naziri işləyən həmkəndlisi Nizami Nadirova avtomatdan atəş açıb, silahdaşları ilə birlikdə Yayıcı kəndi istiqamətindən gələn icra başçısı Vəli Əsgərovun qardaşı Elyar Əsgərovun başına silah dayayaraq ölümcül döyüb.
H. Mehdiyev AXC hakimiyyəti dövründə Şərur rayon Tədarük məntəqəsinin müdiri vəzifəsində çalışıb.
1994-cü ildə Şərur rayonu ərazisində Qurd dərəsi adlanan yerdə polisə qarşı silahlı atışmada iştirak edib, onun silahından açılmış atəş nəticəsində iki nəfər hərbiçi yaralanıb, lakin Mehdiyev qaçıb gizlənib. Bir il həyətində düzəltdiyi yeraltı sığınacaqda gizlənib, polis onun yerini biləndə isə silahlı müqavimət göstərib. Bundan əvvəl isə Şərur rayon icra başçısı işləmiş Vəli Əsgərovun evini Etibar Babayev adlı silahdaşı ilə birlikdə avtomat silahdan atəşə tutub.
28 iyul 1995-ci ildə isə Cinayət Məcəlləsinin 70-2-ci maddəsi (qanunvericilikdə nəzərdə tutulmayan silahlı birləşmələrin və ya qrupların yaradılması ), 189-1-ci (polis işçisinə və ya hərbi qulluqçuya müqavimət göstərmək) maddəsinin ikinci hissəsi və 220-1-ci (odlu silahı, döyüş sursatını və ya partlayıcı maddələri oğurlama) maddəsi ilə təqsirli bilinərək Naxçıvan Muxtar Respublikası Ali Məhkəməsinin 23 aprel 1996-cı il tarixli hökmü ilə 4 il müddətində azadlıqdan məhrumetmə cəzasına məhkum olunub. 1998-ci ildə Milli Məclisin amnistiya qərarına uyğun olaraq vaxtından əvvəl azadlığa çıxıb.
Bunları nəzərə alsaq, onun 23 sentyabrda İnzibati Xətəalar Məcəllsinin 310.1-ci maddəsi ilə (polis işçisi və ya hərbi qulluqçusu ictimai qayadanın mühafizə vəzifəsini icra edərkən onların qanuni tələblərinə qəsdən tabe olmamaq) maddəsi ilə təqsirli bilinərək 15 gün müddətində həbs olunması təəccüblü görünmür”.
Bəyanatda daha sonra H. Mehdiyevi müdafiə edən ziyalılar, QHT-lər və diplomatik korpusa hadisəni təfərrüatı ilə öyrənmək çağırışı edilib: “Əslində nə baş verdiyini aydınlaşdırmadan Həkimeldostu Mehdiyevi jurnalist kimi müdafiə etməyə çalışan səfirliklər özlərinin imiclərinə, nüfuzlarına, gerçəkdən hər hansı siyasi maraqları deyil, demokratiya və söz azadlığın müdafiə etmələri barədə bəyanatlarına kölgə salırlar”./APA/