Bakı – APA. İsveçrəli jurnalist Andre Vidmerin Ermənistan-Azərbaycan münaqişəsi və azərbaycanlı məcburi köçkünlərin həyatı barədə yazdığı “Unudulmuş münaqişə” (Forgotten Conflict) başlıqlı kitab Los Ancelesdə təqdim olunub. Azərbaycanın Los Ancelesdəki Baş Konsulluğunda keçirilən təqdimatda ABŞ Dövlət Departamentinin nümayəndələri, Los Anceles vilayətinin rəsmiləri, xarici ölkələrin baş konsulları və digər şəxslər iştirak edib. Baş Konsulluqdan APA-ya verilən xəbərə görə, tədbiri açan Azərbaycanın Los Ancelesdəki baş konsulu Nəsimi Ağayev Ermənistan tərəfindən Azərbaycan torpaqlarının işğalı, işğal olunmuş ərazilərdə həyata keçirilmiş etnik təmizləmə siyasəti və mülki azərbaycanlı əhaliyə qarşı törədilmiş hərbi cinayətlər, eləcə də BMT Təhlükəsizlik Şurasının işğalı pisləyən qətnamələri barədə iştirakçıları məlumatlandırıb.
Baş konsul bildirib ki, ənənəvi Qərb jurnalistikasından fərqli olaraq Andre Vidmer yüksək cəsarət göstərərək Qarabağ həqiqətlərini öz kitabında tam obyektiv şəkildə təqdim edib. Qeyd olunub ki, jurnalist işğal olunmuş Azərbaycan ərazilərinə səfər edərək orada, xüsusilə Ağdam və Şuşada, Ermənistan tərəfindən törədilmiş dağıntıları kitabında əks etdirib, eləcə də azərbaycanlı məcburi köçkünlərlə görüşərək, onların həyatı barədə oxucuları məlumatlandırıb.
Sonra söz A. Vidmerə verilib. Jurnalist ilk dəfə Azərbaycanın işğal olunmuş ərazilərinə 2008-ci ildə səfər etdiyini və gördüklərindən dəhşətə gəldiyini söyləyib. O, vaxtilə azərbaycanlıların yaşadığı şəhər və kəndlərin işğaldan sonra böyük dağıntılara məruz qaldığını, bəzilərinin isə hətta yerlə-yeksan edildiyini qeyd edib. Bu səpkidə A. Vidmer vaxtilə 50 mindən çox azərbaycanlının yaşadığı Ağdam şəhərinin bu gün artıq mövcud olmadığını və baş vermiş dağıntıların böyük əksəriyyətinin məhz işğaldan sonra həyata keçirildiyini diqqətə çatdırıb. Şuşa şəhərində də həyata keçirilmiş dağıntılardan danışan jurnalist bunun nəinki mənəvi bir cinayət, eləcə də ciddi beynəlxalq hüquq pozuntusu olduğunu bəyan edib. Cəbhəyanı ərazilərdə yaşayan azərbaycanlı məcburi köçkünlərlə görüşləri barədə danışan A. Vidmer öz evlərini və doğma torpaqlarını itirmiş bu insanların böyük haqsızlığa məruz qaldığını, ancaq beynəlxalq ictimaiyyətin münaqişənin bu faciəvi humanitar aspektinə lazımi diqqət göstərmədiyini qeyd edib. Ermənistan hökumətinin bütün bunları dünya ictimaiyyətindən gizlətmək üçün əlindən gələni etdiyini, ancaq həqiqətin əvvəl-axır üzə çıxdığını vurğulayan A. Vidmer öz kitabı ilə azərbaycanlılara qarşı törədilmiş bu ədalətsizlikləri işıqlandırmaq arzusunda olduğunu bildirib.
Daha sonra Kaliforniya San Dieqo Universitetinin professoru, sabiq ABŞ diplomatı Dr. Ceyms Koyl çıxış edərək, Ermənistan-Azərbaycan münaqişəsinin geosiyasi aspektləri barədə iştirakçıları məlumatlandırıb.
Təqdimatdan sonra iştirakçılar Ağdam şəhərinin yerlə-yeksan edilməsinə həsr olunmuş “Qafqazın Hiroşiması” başlıqlı foto-sərgi ilə tanış olublar. Sərgidə Ağdamın işğaldan öncəki və işğal sonrası fotoşəkilləri nümayiş etdirilib.
Qeyd edək ki, Kaliforniyaya səfəri müddətində A. Vidmer öz kitabını Çepmen Universitetinin tələbə və professor heyətinə də təqdim edib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
