Bakı-APA. Mayın 24-də Litva Respublikasının paytaxtı Vilnüs şəhərində Azərbaycanın bu ölkədəki səfirliyi tərəfindən 28 May – Respublika Gününə həsr olunmuş qəbul təşkil edilib.
Bu barədə APA-ya səfirlikdən bildirilib. Məlumata görə, qəbulda Litva Respublikası Seym sədrinin birinci müavini Vidas Qedvilas Litvanın nəqliyyat və kommunikasiya naziri Rimantas Sinkeviçius, ətraf mühit naziri Kestutis Treçiokas, Fövqəladə Hallar Departamentinin direktoru, general Remigiyus Baniulis, “LRT” dövlət kanalının baş direktoru Audrius Siauruseviçius, baş nazirin müşaviri Antanas Vinkus, Seymin Xarici İşlər Komitəsinin sədri Benediktas Yuodka və Seymin üzvləri, təhsil, mədəniyyət və kənd təsərrüfatı nazirlərinin müavinləri, Litvanın siyasi və ictimai xadimləri, universitet rektorları və müəllimləri, qeyri-hökumət təşkilatlarının rəhbərləri, yerli KİV nümayəndələri, Litvada daimi yaşayan soydaşlarımız və tələbələr, Litva Azərbaycanlı Gənclər Təşkilatının (AYOL) üzvləri iştirak ediblər.
Hər iki ölkənin dövlət himnləri səsləndirildikdən sonra səfir Həsən Məmmədzadə çıxış edərək tədbir iştirakçılarına Respublika Günü haqqında məlumat verib. Səfir öz çıxışında Şərqdə ilk dəfə olaraq Azərbaycanda yaradılmış demokratik respublikanın fəaliyyəti barədə danışıb.
Daha sonra qonaqlara Azərbaycanlı musiqiçi və bəstəkar Teymur Nadirin rəhbərliyi ilə hazırlanmış musiqi proqramı təqdim edilib. Proqram çərçivəsində Litvada yaşayan gənc müğənni Ülviyyə Cons-Rəhimovanın ifaları dinlənilib.
Sonda qonaqlara ziyafət verilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
