Hadisə

Sabunçu Rayon Məhkəməsində ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işi məhkəmə prosesi fasilədən sonra davam etdirilib.

APA-nın xəbərinə görə, günün ikinci keçirilən prosesdə "Bakı Metropolitieni" QSC-nin keçmiş rəisi Tağı Əhmədovun qardaşı oğlu Şövqü Əhmədov və qohumu Elşən Tağıyev ifadə verib. Onlar istintaqa verdikləri ifadəni təsdiq ediblər. Lakin məhkəmə prosesində verdikləri ifadə ilə istintaq zamanı verdikləri ifadələr arasında ziddiyyət olduğundan onların ifadələri elan edilib. Hər iki şəxs məhkəmədə ifadələrində bildiriblər ki, MTN-nə aparılıblar. Onlar təqsirləndirilən şəxslərin heç birini tanımadıqlarını və MTN-də kim tərəfindən döyüldüklərini bilmədiklərini deyiblər. Bildirilib ki, MTN-də onları döyüb Tağı Əhmədovun əleyhinə ifadə almaq istəyiblər. Ş. Əhmədov həmin təzyiqlər nəticəsində T. Əhmədovun əleyhinə ifadə verdiyini deyib. E. Tağıyev isə onun əleyhinə ifadə vermədiyini bildirib. Hər iki şəxs istintaq zamanı hər hansı təzyiqə məruz qalmadıqlarını, sərbəst ifadə verdiklərini və həmin ifadəni təsdiq etdiklərini deyiblər.

Məhkəmə iclasında bildirilib ki, növbəti iclasda Tağı Əhmədov ifadə verəcək.

Proses dekabrın 28-də davam edəcək.

***

13.15

Sabunçu Rayon Məhkəməsində ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işi məhkəmə prosesi davam etdirilib.

APA-nın xəbərinə görə, prosesdə "Bakı Metropolitieni" QSC-nin keçmiş rəisi Tağı Əhmədovun zərərçəkmiş kimi ifadə verəcəyi bildirilib. Təqsirləndirilən şəxslərin vəkilləri buna etiraz ediblər. Onlar həmin epizod üzrə hazırlaşmaq üçün məhkəmədən vaxt istəyiblər. Bildiriblər ki, epizod üzrə cinayət işinin materiallarını özləri ilə gətirməyiblər.

Buna səbəbdən günün ikinci yarsına kimi fasilə elan edilib. İclasda T. Əhmədovun ifadə verəcəyi gözlənilir.

A. Çovdarovun vəkili Sadiq Rəsulov jurnalistlərə bildirib ki, iclasda A. Çovdarovun vəziyyəti pisləşib və ona tibbi yardım göstərilib.

Qeyd edək ki, təqsirləndirilən şəxslər - Akif Çovdarova Cinayət Məcəlləsinin 145.3 (Qanunsuz azadlıqdan məhrumetmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israfetmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədilə törədildikdə), 182.3.1, 182.3.2 (Hədə-qorxu ilə tələbetmə külli miqdarda əmlak əldə etmək məqsədilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri, Səlim Məmmədova həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.1, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri, Akif Əliyevə həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri və Orxan Osmanova isə həmin Məcəllənin 145.3, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 341.2.1, 341.2.2 və 341.2.3-cü maddələri ilə yekun ittihamlar irəli sürülüb.

Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarov, Səlim Məmmədov, Akif Əliyev və Orxan Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.