İnfrastruktur

Ana səhifə

İnfrastruktur

Azərbaycan Gömrük Tarixi Muzeyinin eksponatları Budapeştdə nümayiş etdirilib

19 iyul 2012 13:10 (UTC +04:00)

Bakı. Elnur Hüseynquluyev - APA-Economics. Azərbaycan Dövlət Gömrük Komitəsinin (DGK) nümayəndə heyəti Budapeştdə (Macarıstan) keçirilən Ümumdünya Gömrük Təşkilatı (ÜGT) Avropa regionu gömrük muzeylərinin tədbirində iştirak edib.

Komitədən «APA-Economics»ə verilən məlumata görə, tədbirdə Macarıstanın Gömrük və Vergi Tarixi Muzeyində Macarıstan Dövlət Vergi və Gömrük Administrasiyasının Baş direktoru Karolu Szabo bildirib ki, yığıncağın keçirilməsi ÜGT-nin təsis edilməsinin 60-cı ildönümü ilə əlaqədardır və ÜGT ilə milli gömrük təşkilatları arasında əməkdaşlığın daha da genişləndirilməsi baxımından böyük əhəmiyyət daşıyır. Həmin gün Macarıstanın Gömrük və Vergi Tarixi Muzeyinin və eyni zamanda «Bizim Azərbaycan» sərgisinin təqdimatı keçirilib.

Azərbaycan nümayəndə heyətinin başçısı, «Azərterminalkompleks» Birliyinin direktoru Qambay Əliyev nümayiş etdirilən Azərbaycan ekspozisiyaları barədə məlumat verib. O qeyd edib ki, «Bizim Azərbaycan» adlanan sərgi Azərbaycan Gömrük Tarixi Muzeyi Filialının təxminən 500 eksponatdan ibarət «Qədim və Orta əsrlər» bölməsinin kiçik bir hissəsidir. Sərgidəki təqdimat 25 eksponatdan təşkil olunan çox qiymətli kolleksiyanı əhatə edir. Q.Əliyev sərginin məqsədinin tamaşaçılarda 2006-cı ildən etibarən fəaliyyət göstərən Azərbaycan Gömrük Tarixi Muzeyi, habelə Azərbaycanın zəngin mədəniyyəti və tarixi haqqında az da olsa, obyektiv təəssürat yaratmaq olduğunu söyləyib.

Sonra ÜGT-nin Regional Tədris Mərkəzində konfransın plenar iclası keçirilib. İlk olaraq müvəffəqiyyətlə nümayiş etdirilən sərgiyə görə Azərbaycan DGK-nın ünvanına minnətdarlıq ifadə olunub. ÜGT Baş katibinin müavini Sergio Muxitsa Montes çıxışında milli gömrük orqanlarının ÜGT ilə ikitərəfli əlaqələrində gömrük muzeylərinin rolundan bəhs edib. İclas zamanı milli gömrük muzeylərinin təqdimatı da keçirilib. Tədbirdə iştirak edən ölkələr içərisində yalnız Azərbaycanın Gömrük Tarixi Muzeyi Filialından bəhs edən sənədli filmin təqdimatı keçirilib.

Konfransın son günü ÜGT Baş katibinin müavini Sergio Muxitsa Montes yekun nitqi söyləyib və bildirib ki, gömrük muzeyləri təşkilatla bundan sonra da sıx əməkdaşlıq edəcəklər. Daha sonra Macarıstan Dövlət Vergi və Gömrük Administrasiyasının beynəlxalq münasibətlər şöbəsinin rəis müavini Qaboru Hoka çıxış edib və yalnız Azərbaycan nümayəndə heyətinə həm yüksək səviyyədə hazırlanmış sərgiyə, həm də Azərbaycanın Gömrük Tarixi Muzeyinin fəaliyyətindən ətraflı bəhs edən sənədli filmə görə xüsusi minnətdarlığını bildirib.

Konfransın sonunda bütün iştirakçılar tərəfindən gömrük irsinin gələcək nəsillər naminə qorunub saxlanması məqsədilə gömrük muzeyləri arasındakı əlaqələrin genişləndirilməsi imkanlarının öyrənilməsi və gələcək əməkdaşlığın möhkəmləndirilməsinə töhfə verilməsinə sadiqliklərini təsdiq etməklə bağlı Bəyannamə imzalanıb.