Sahibkarlıq

Ana səhifə

Sahibkarlıq

Azərbaycanda yeni toxucu müəssisəsi investisiya müsabiqəsinə çıxarılıb

17 fevral 2009 07:18 (UTC +04:00)

Bakı. Vüqar İsrafilov - APA-Economics. Azərbaycan hökuməti «Mingəçevir-toxucu» Açıq Səhmdar Cəmiyyətinin (ASC) 99,31% səhminin satışı üzrə investisiya müsabiqəsi elan edib. Bu barədə «APA-Economics»ə Dövlət Əmlakının İdarə Edilməsi üzrə Dövlət Komitəsindən məlumat verilib.
Pambıq lifinin və pambıq parçaların istehsalı ilə məşğul olan müəssisənin 683 010 səhminin satışı üzrə müsabiqədə həm yerli, həm də xarici investorlar iştirak edə bilər. İnvestorların hazırladıqları sərmayə proqramı əsasən yüksək keyfiyyətli iplik sap və pambıq parça istehsalı və müasir texnologiyaların tətbiqi ilə bərabər, yeni iş yerlərinin açılması və işçilərin sosial vəziyyətinin yaxşılaşdırılmasını nəzərdə tutmalıdır. Bundan başqa, proqramda investisiyaların konkret həcmi və sərmayə qoyuluşlarının müddəti qeyd olunmalıdır. Müsabiqə qalibi səhmlərə görə dövlət büdcəsinə ən azı 700 min manat və 25 min özəlləşdirmə çeki, xarici investorlar isə əlavə olaraq eyni sayda özəlləşdirmə opsionu təqdim etməlidir.
Müsabiqənin şərtlərinə uyğun olaraq, qalibin elan olunması günündən bir ay sonra müvafiq saziş imzalanmalı və onun bağlanılması günündən başlayaraq 2 ay ərzində səhmlərə görə bəyan olunan investisiya həcminin 5%-i «Mingəçevir-toxucu» ASC-nin hesabına köçürülməlidir.
Müsabiqə üzrə təkliflər 2009-cu il martın 16-dək qəbul olunur, onların qiymətləndirilməsi isə martın 19-dan keçiriləcək.
Qeyd edək ki, Mingəçevir şəhərində yerləşən toxuculuq müəssisəsi 1960-cı ildə istismara verilib və hazırda müəssisədə 800 nəfər çalışır. «Mingəçevir-toxucu» ASC-nin öhdəlikləri 859 695 manat, debitor borcu 3 007 798 manat, nizamnamə kapitalı 1 375 568 manat təşkil edir, səhmlərin nominal dəyəri isə 2 manatdır.