Sahibkarlıq

Ana səhifə

Sahibkarlıq

Azərbaycan və Yunanıstanın françayzinq assosiasiyaları arasında əməkdaşlıq müqaviləsi imzalanıb

18 fevral 2009 07:01 (UTC +04:00)

Bakı. Nicat Mustafayev – APA-Economics. Afinada keçirilən Yunanıstan-Azərbaycan biznes-forumu çərçivəsində Azərbaycan Françayzinq Assosiasiyası (AFA) ilə Yunanıstan Françayzinq Assosiasiyası (YFA) arasında əməkdaşlıq müqaviləsi imzalanıb.
AFA-dan «APA-Economics»ə verilən məlumata görə, müqaviləni Azərbaycan tərəfindən AFA-nın Direktorlar Şurasının sədri Elşən Musayev, Yunanıstan tərəfindən isə YFA-nın baş direktoru Sotiris Yanakakis imzalayıb.
Müqavilənin əsas məqsədi Azərbaycanda və Yunanıstanda françayzinq təcrübəsinin öyrənilməsi, effektiv inkişafı və yayılması, beynəlxalq françayzinq sisteminin yerli bazar şərtlərinə uyğunlaşdırılmasına kömək və informasiya mübadiləsinin həyata keçirilməsidir.
Qeyd edək ki, Afinada keçirilən biznes-forum Azərbaycan İqtisadi İnkişaf Nazirliyi, Azərbaycanda İxracın və İnvestisiyaların Təşviqi Fondu (Azpromo) və Yunanıstan Sahibkarlar Federasiyası tərəfindən təşkil olunub. Forumda Azərbaycanın maliyyə, tikinti, İKT, kənd təsərrüfatı, bank və sığorta, turizm və digər sahələrdə fəaliyyət göstərən 25-30 şirkətin nümayəndələri iştirak edib. Biznes-forum çərçivəsində Azərbaycan və Yunanıstan sahibkarları arasında ikitərəfli görüşlər də təşkil olunub.
Xatırladaq ki, AFA 2007-ci ildə yaradılıb və həmin ilin sentyabr ayında AFA Baltik Françayzinq Assosiasiyası, noyabrda isə Türkiyə Françayzinq Assosiasiyası ilə əməkdaşlığa dair müqavilə imzalayıb. AFA Rusiya, Almaniya, Ukrayna françayzinq assosiasiyaları ilə sıx əməkdaşlıq edir. AFA-nın məqsədi Azərbaycanda françayzinq təcrübəsindən istifadə etməklə kiçik və orta sahibkarlığı inkişaf etdirmək, yeni brendlərin Azərbaycana gətirilməsi və Azərbaycanda françayzinq qanunvericiliyinin öyrənilməsi və tətbiq edilməsidir. Assosiasiya hazırda bir çox Amerika və Avropa şirkətlərinin Azərbaycanda françayzinq yolu ilə açılması ilə məşğul olur.