Sahibkarlıq

Ana səhifə

Sahibkarlıq

Azərbaycan ÜTT-yə üzvlüklə bağlı ilin sonuna kimi daha bir neçə ölkə ilə apardığı danışıqları başa çatdıracaq

20 fevral 2009 10:52 (UTC +04:00)

Bakı. Nicat Mustafayev – APA-Economics. Bu gün Bakıda Xəzər-Avropa İnteqrasiya İşgüzar Klubunun (CEIBC) üzvlərinin Azərbaycanın xarici işlər nazirinin müavini Mahmud Məmmədquliyev ilə görüşü keçirilib.
«APA-Economics»in məlumatına görə, görüşdə müzakirələr əsasən Azərbaycanın Ümumdünya Ticarət Təşkilatına (ÜTT) gözlənilən üzvlüyün ölkədəki şirkətlərə təsiri ilə bağlı məsələlər ətrafında aparılıb.
Tədbirin açılış mərasimində çıxış edən CEIBC-nin icraçı direktoru Telman Əliyev klubun fəaliyyətindən danışıb və qeyd edib ki, 2009-cu ilin sonunda Astanada (Qazaxıstan) Klubun ofisinin açılması nəzərdə tutulub.
Öz növbəsində M.Məmmədquliyev bildirib ki, Azərbaycanın xarici siyasətinin əsas prinsipləri milli maraqların qorunması, iqtisadiyyatın inkişafı, xarici investisiyaların ölkəyə cəlb olunması və digər aspektlərə əsaslanır. Nazir müavini həmçinin qeyd edib ki, ötən 5 il ərzində Azərbaycanın ÜTT-yə üzv olması prosesində bir o qədər də irəliləyiş olmayıb. Belə ki, həmin müddət ərzində Latviya ÜTT-yə üzv olma prosesini başa çatdırıb. Azərbaycan tərəfindən isə əsas aktivlik 2004-cü ildən etibarən müşahidə olunub: «Bu müddət ərzində Azərbaycan 6 ölkə ilə danışıqları başa çatdırıb, bunlardan 3-ü ilə ikitərəfli protokol imzalayıb və işçi qrupunun bir sıra iclasları keçirilib. Danışıqlar fəal aparılarsa Azərbaycan bu ilin sonuna kimi bir neçə ölkə ilə də danışıqları başa çatdıracaq. Hazırda müşahidə olunan dünya maliyyə böhranı isə aparılacaq danışıqlara mənfi təsir göstərməyəcək».
M.Məmmədquliyev onu da vurğulayıb ki, Azərbaycan ÜTT-yə üzv olandan sonra ölkənin daxili bazarında rəqabət artacaq və yerli şirkətlər buna hazır olmalıdır.
ÜTT-yə üzvlüyün müsbət təsirindən danışan nazir müavini qeyd edib ki, Çin bu təşkilata üzv olandan sonra bu ölkəyə yatırılan investisiyaların həcmi və xarici ticarət dövriyyəsi 2 dəfə artıb. Bolqarıstanda isə sərmayələrin həcmi 5 dəfə artıb: «Ukrayna ÜTT-yə üzv olandan sonra xarici əlaqələr sahəsində qarışıqlı xidmətlər balansında təxminən 2 mlrd. dollarlıq müsbət saldoya nail olub ki, bu ölkədə belə rəqəm heç vaxt müşahidə olunmayıb».
M.Məmmədquliyevin sözlərinə görə, Azərbaycan bir neçə ölkə ilə iqtisadiyyatın bir sıra sahələrini əhatə edən danışıqlar aparacaq: «Azərbaycan ÜTT-yə öz iqtisadi maraqları ilə üzv olmaq niyyətindədir».
Qeyd edək ki, Azərbaycan 1997-ci ildə ÜTT-də müşahidəçi statusu alıb. Hazırda 153 ölkə ÜTT-nin üzvüdür.