Sahibkarlıq

Ana səhifə

Sahibkarlıq

Azərbaycanda gömrük proseduralarının sadələşdirilməsi istiqamətində tədbirlər görülür

23 fevral 2009 09:09 (UTC +04:00)

Bakı. Nicat Mustafayev – APA-Economics. Azərbaycan-Türkiyə İş Adamları Birliyinin (ATİB) üzvləri ilə Dövlət Gömrük Komitəsinin nümayəndələri arasında görüş keçirilib.
ATİB-dən «APA-Economics»ə verilən məlumata görə, görüşdə DGK-nin Gömrük nəzarətinin təşkili Baş İdarəsinin baş inspektoru Mahir İbrahimov, Maliyyə tarif və valyuta nəzarəti Baş İdarəsinin vergi və yığımlar şöbəsinin rəisi Rüfət Elçiyev iştirak ediblər. Görüşün keçirilməsində məqsəd gömrük siyasəti və qanunvericiliyi sahəsində yeniliklər, «bir pəncərə» sisteminin tətbiqi, gömrük tarifləri və s. barədə iş adamlarını məlumatlandırmaq olub.
M.İbrahimov «bir pəncərə» sisteminin dünyanın əksər ölkələrində tətbiq olunduğunu söyləyərək bildirib ki, bu sistemin tətbiq olunmasında əsas məqsəd mal və məhsulların operativ və tez keçirilməsinin təmininin təşkilidir: «Əvvəllər iş adamları sərhəddən keçərkən vaxt itkisi yaşayırdılar. Lakin indi həyata keçirilməsi planlaşdırılan yenidənqurma işləri nəticəsində sərhəddəki vaxt itkisi minimuma endiriləcək».
M.İbrahimov həmçinin yeni Gömrük Məcəlləsinin hazırlanaraq Milli Məclisə təqdim olunduğunu bildirib və qeyd edib ki, riskin idarə olunması baxımından ölkə ərazisinə gələnlər üçün qırmızı, sarı, yaşıl və s. koridorlar tətbiq ediləcək: «Bir pəncərə» sisteminə əsasən, mallar haqqında əvvəlcədən məlumat alınır, malın hansı koridora daxil ediləcəyi müəyyən edilir. Hazırda koridorların tikilməsi prosesi gedir. Qaçaqmalçılıq və qanun pozuntuları aşkar olunması halında həmin mal və nəqliyyat vasitəsi qırmızı koridora yönəldiləcək». M.İbrahimov yaşıl koridordan sonra audit yoxlamalarının həyata keçirilə biləcəyi barədə də məlumat verib.
M.İbrahimov mal və nəqliyyat vasitələrinin sərhəddə təqdim olunandan sonra 20 dəqiqə ərzində keçməsinin təmin ediləcəyi barədə də məlumat verib: «Əgər qanunvericilikdə müəyyən olunmuş heç bir pozuntu yoxdursa, mal və nəqliyyat vasitəsinin çox qısa müddətdə gömrük məntəqəsindən keçməsi təmin olunacaq».
Öz növbəsində R.Elçiyev DGK-nin Avropa Gömrük Təşkilatlarına üzv olmaq istəyindən söz açaraq bildirib ki, tariflər sisteminin 7 pillədən 3 pilləyə endirilməsi gözlənilir.
R.Elçiyev gömrük yığımlarının Ümumdünya Ticarət Təşkilatının tələblərinə uyğun olaraq yeganə yığım – optimal məbləğin müəyyən edilməsi üzərində işləndiyini qeyd edib.