Sahibkarlıq

Ana səhifə

Sahibkarlıq

Yuri Şedrin: «Azərbaycanda Rusiya kapitallı 550 şirkət fəaliyyət göstərir»

25 fevral 2009 11:19 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanla Rusiya arasında ticarət dövriyyəsinin həcmi 2007-ci illə müqayisədə 39,3% artaraq 2 402,5 mln. ABŞ dollarına çatıb. «APA-Economics»in məlumatına görə, bunu iki ölkə arasında 2008-ci ildə aparılan ticarət əlaqələrinin yekunlarına dair bu gün keçirilən mətbuat konfransında Rusiyanın Azərbaycandakı ticarət nümayəndəsi Yuri Şedrin bildirib.
Y.Şedrinin sözlərinə görə, bu göstərici iki ölkənin qarşıya məqsəd kimi qoyduğu həcmi üstələyib və bununla da proqnozlar artıqlaması ilə yerinə yetirilib: «Rusiya Azərbaycanın əsas ticarət tərəfdaşlarındandır. Xarici ölkələrdən ötən il ərzində Azərbaycana idxal olunan mal və məhsulların 19%-ni Rusiya məhsulları təşkil edib».
Y.Şedrin əlavə edib ki, ötən il ərzində Rusiyanın Azərbaycana ixracı 42,6% artaraq 1 991,1 mln. dollara, idxal isə 25% artaraq 411,4 mln. dollara çatıb və nəticədə, 1 579,7 mln. dollarlıq müsbət saldo yaranıb.
Y.Şedrin həmçinin bildirib ki, ötən il ərzində Rusiyadan Azərbaycana gətirilən bütün məhsulların 37%-ni qeyri-xammal məhsulları təşkil edib: «Hazırda biz Azərbaycanla 1 720 mal mövqeyi üzrə ticarət mübadiləsi aparırıq».
Rusiyanın Azərbaycandakı ticarət nümayəndəsinin sözlərinə görə, 2008-ci ildə Rusiyadan Azərbaycana 15 637 ədəd minik avtomobili, 6 108 ədəd yük avtomobili, 143 ədəd avtobus, 55 ədəd avtokran, 371 ədəd xüsusi təyinatlı avtomobil və 191 ədəd traktor gətirilib: «Təkcə «AvtoVAZ» zavodu 2008-ci ildə Azərbaycana 11,5 min müxtəlif modeldə «Jiquli» avtomobili idxal edib. «Metrovaqonmaş» ASC isə Bakı Metropoliteninə 36 vaqon göndərib».
Rusiyanın Azərbaycanda fəaliyyət göstərən «Baltika», «Rossiyskie Jeleznıe Doroqi», «VneşTorqBank», «Rosno» və digər iri şirkətlərindən danışan Y.Şedrin hazırda Azərbaycanda ümumilikdə 550 Rusiya şirkətinin fəaliyyət göstərdiyini bildirib: «Bunların təxminən yarısı birgə müəssisə, digər hissəsi isə 100% Rusiya kapitallı şirkət və müəssisələrdir».
Bundan başqa, Y.Şedrin vurğulayıb ki, hazırda Rusiyanın Azərbaycana yatırdığı investisiyaların həcmi cəmi 12 mln. dollar təşkil edir, bu da yaxşı nəticə deyil. Lakin Y.Şedrin vurğulayıb ki, Nardaranda Rusiyanın «Crocus» şirkətinin kurort zonasının tikintisinə 1 mlrd. dollar, «Baltika» şirkətinin pivə istehsalına 20 mln. dolların yatıracağı gözlənilir.
Sonda Y.Şedrin bildirib ki, bu il ərzində iki ölkə arasında ticarət dövriyyəsinin 2,5 mlrd. dollara çatacağı proqnozlaşdırılsa da, maliyyə böhranı ilə əlaqədar bu proqnoza yenidən baxılacaq.
Tədbirdə çıxış edən Tatarıstanın Azərbaycandakı daimi nümayəndəsi Nail Zaripov isə qeyd edib ki, ötən il ərzində Azərbaycanla Tatarıstan arasında ticarət dövriyyəsi 110 mln. dollar təşkil edib. Bunun 100 mln. dolları Tatarıstandan Azərbaycana, 10 mln. dolları isə Azərbaycandan Tatarıstana göndərilən mal və məhsulların payına düşüb: «Bu göstəricinin artırılması üçün tərəflərin geniş potensialı mövcuddur. Belə ki, Tatarıstanla Türkiyə arasında 2 mlrd. dollarlıq ticarət dövriyyəsi var. Azərbaycan şirkətlərini ixracatı artırmağa çağırırıq ki, Azərbaycandan Tatarıstana göndərilən məhsulların həcmi heç olmasa 40-50 mln. dolar təşkil etsin».