Sahibkarlıq

Ana səhifə

Sahibkarlıq

ATİB növbəti iki il üçün UBCCE-nin vitse-prezidenti seçilib

05 mart 2009 08:19 (UTC +04:00)

Bakı. Nicat Mustafayev – APA-Economics. İstanbulda (Türkiyə) Qara dəniz və Xəzər dənizi İş Adamları Konfederasiyaları Birliyinin (UBCCE) ümumi yığıncağının ikinci iclası keçirilib.
Azərbaycan-Türkiyə İş Adamları Birliyindən (ATİB) «APA-Economics»ə verilən məlumata görə, tədbirdə ATİB-i bu qurumun İdarə Heyətinin sədr müavinləri Ali İhsan Genc və Cemal Yangın, baş katib Rəşad Rəsullu, beynəlxalq əlaqələr şöbəsinin baş mütəxəssisi Fərid Məlikov və layihələr və tədqiqatlar şöbəsinin baş mütəxəssisi Amin Çərkəzov təmsil ediblər.
İclasda qəbul edilən qərarlara əsasən, 2009-2011-ci illər üçün UBCCE sədrliyi Türkiyə Sənayeçi İş Adamları Dərnəyindən (TÜSİAD) Yunanıstan Sahibkarlar Federasiyasına (SEV) keçib. ATİB isə növbəti iki il üçün UBCCE-nin I vitse-prezidenti seçilib. Bundan əvvəl təşkilatın vitse-prezidenti olan ATİB eyni zamanda «Regional İqtisadi İnteqrasiya» Tematik Komitəsinə də rəhbərlik edəcək. Bundan başqa, ATAMEKEN Union (Qazaxıstan Milli İqtisadi Palatası), TISK (Türkiyə İşəgötürənlər Konfederasiyaları Assosiasiyası) və ACPR (Rumıniya İşəgötürənlər Konfederasiyaları Alyansı) müvafiq olaraq «Biznes mühitinin inkişafı», «İnnovasiya və sahibkarlıq», «Avropa İttifaqı və BUSINESSEUROPE ilə əlaqələr» üzrə vitse-prezident seçilib.
Tədbir zamanı UBCCE ilə Beynəlxalq Sahibkarlar və İşəgötürənlər Konqresi (ICEA) və Türkiyə Sahibkarlar və İşəgötürənlər Konfederasiyası (TÜRKONFED) arasında anlaşma və qarşılıqlı əməkdaşlıq sazişi imzalanıb.
Toplantı zamanı həmçinin Gürcüstan Sahibkarlar Konfederasiyası (GEC), İraq İş Adamları Birliyi (IBMU), Ukrayna İşəgötürənlər Federasiyası (FEU) UBCCE üzvlüyünə qəbul edilib. Yeni üzvlər daxil olmaqla, UBCCE üzvlərinin sayı 22-yə çatıb.
Qeyd edək ki, iclasda UBCCE-nin 2008-ci il fəaliyyətinin yekununa nəzər yetirilib və 2009-cu il üçün fəaliyyət planı və büdcə müzakirə olunaraq təsdiq edilib.
Xatırladaq ki, ATİB-in əsas təşəbbüsçülərindən biri olduğu UBCCE 2006-cı ilin noyabrın 27-lə İstanbulda Qara dəniz və Xəzər dənizi regionunu təmsil edən 12 ölkənin iş adamlarını təmsil edən 16 təşkilatın iştirakı ilə təsis edilib. Balkan ölkələri, Qara dəniz, Qafqaz və Xəzər dənizi bölgəsindəki ölkələrin müstəqil və könüllü əsasda yaradılmış iş dünyası təşkilatlarını əhatə edən Birliyin Təsis Yığıncağında Albaniya, Azərbaycan, Bosniya-Herseqovina, Bolqarıstan, Gürcüstan, İran, Yunanıstan, Qazaxıstan, Makedoniya, Rumıniya, Serbiya və Türkiyənin təmsilçiləri iştirak edib.