Sahibkarlıq

Ana səhifə

Sahibkarlıq

Azərbaycanın səhiyyə sektorunun mövcud vəziyyəti və inkişaf perspektivləri ilə bağlı tədqiqat aparılıb

11 mart 2009 11:59 (UTC +04:00)

Bakı. Rəşad Süleymanov – APA-Economics. Azərbaycan-Türkiyə İş Adamları Birliyi (ATİB) «Azərbaycanın səhiyyə sektoru: mövcud vəziyyət və inkişaf perspektivləri» mövzusunda hazırlanmış tədqiqatını ictimai müzakirəyə çıxarıb. «APA-Economics»in məlumatına görə, bu gün ATİB-də keçirilən tədbirdə tədqiqatın müəllifi İlkin Nəzərov bildirib ki, layihənin əsas məqsədi səhiyyə sahəsində biznes mühitinin təhlili, tibb xidmətlərinin mövcud vəziyyəti, maliyyələşmə mexanizmlərinin qiymətləndirilməsi və səhiyyə sektorunun inkişaf perspektivləri ilə bağlı tövsiyələrin hazırlanmasından ibarətdir.
Səhiyyə sektorunun inkişafının hökumətin əsas prioritetlərindən olduğunu deyən İ.Nəzərov qeyd edib ki, ötən dövrdə dövlət tərəfindən əsas vəsait stasionar müalicəyə ayrılıb. Tədqiqat nəticəsində məlum olub ki, Azərbaycanda ilkin tibbi yardım göstərən həkimlərin sayı Avropa ölkələri ilə müqayisədə 2 dəfə azdır. Səhiyyə sektorunda özəl sektorun payı 10%-dən azdır və hazırda ölkədə 300-dən artıq özəl tibb müəssisəsi (37%-i müalicə profilaktik, 18%-i xəstəxana, 14%-i stomatoloji xidmət və s.) fəaliyyət göstərir. Özəl müəssisələrin təxminən 80%-i Bakıda yerləşir. Bununla belə, əhalinin hər 100 min nəfərindən bütün səbəblərdən ölənlərin sayı 2003-cü illə müqayisədə 5% artıb.
«Tədqiqatlar göstərir ki, 2003-cü ildən 2007-ci ilədək dövlət büdcəsindən səhiyyə sektoruna ayrılan vəsait 5 dəfə artıb. Əvvəllər Azərbaycanda həkim brendi üstünlük təşkil etdiyi halda, bu gün müəssisə brendinin inkişafı müşahidə olunur. Könüllü tibbi sığorta son üç ildə 4 dəfəyə yaxın artaraq 19 mln. manatdan çox olub», - deyə tədqiqat müəllifi vurğulayıb.
İ.Nəzərov tədqiqatda səhiyyə sektorunda gözlənilən «təhlükələr»in də yer aldığını qeyd edib. Bu sırada tibb xidmətləri və istehsal edilmiş tibb məhsullarına, tibb müəssisələrinin müvafiq texniki standartlara uyğunluğuna nəzarətin gücləndirilməsi, qanunvericilikdəki boşluqların aradan qaldırılması vacib hesab olunur. Həmçinin, Səhiyyə Nazirliyinin tənzimləyici və təsərrüfat funksiyalarının ayrılması, xarici investisiyaların cəlb edilməsi, özəl müəssisələrin icbari tibbi sığorta sistemi vasitəsi ilə xidmətlərə cəlbi, özəl səhiyyə müəssisələrində qiymətlərin tənzimlənməsi, müəssisələr və pasientlər arasında müqavilələrin bağlanılmasına nəzarətin gücləndirilməsi və s. tövsiyə olunur.
Qeyd edək ki, sözügedən tədqiqat 2008-ci ilin oktyabr-dekabr ayları ərzində hazırlanıb. ATİB tədqiqat proqramı çərçivəsində yaxın vaxtlarda «Azərbaycanda azad rəqabətin mövcud vəziyyəti və ölkə iqtisadiyyatına təsiri», «Maliyyə sektoru üzrə hesabat», «Təhsil sektorunun və biznesin qarşılıqlı əlaqələrinin inkişaf perspektivləri» mövzularında həyata keçirdiyi araşdırmalar üzrə ictimai müzakirələr keçirməyi planlaşdırır.