Sahibkarlıq

Ana səhifə

Sahibkarlıq

Azərbaycan paytaxtında istehlakçı hüquqlarının dövlət müdafiəsi mövzusunda konfrans keçirilir

12 mart 2009 09:01 (UTC +04:00)

Bakı. Nicat Mustafayev – APA-Economics. Bakıda Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidmətinin təşkilatçılığı ilə «İstehlakçı hüquqlarının müdafiəsi dövlətin prioritet vəzifəsidir» mövzusunda konfrans keçirilir.
«APA-Economics»in məlumatına görə, tədbirin açılış mərasimində iştirak edən İstehlak Bazarına Nəzarət üzrə Dövlət Xidmətinin rəisi Zahid İsayev bildirib ki, iqtisadi artım, əhalinin gəlirlərinin çoxalması və müxtəlif mallara, xidmətlərə tələbatı, zövqü, istehlak vərdişlərini dəyişdirib və istehlakçılar öz hüquqlarının müdafiəsinə daha çox əhəmiyyət verməyə başlayıb: «Elə bu səbəbdən də, son dövrlər istehlakçıların hüquqlarının müdafiəsi Azərbaycanda daim aktuallıq kəsb edən məsələlərdən birinə çevrilib. Bu gün tam əminliklə deyə bilərik ki, Azərbaycanda istehlakçıların hüquqlarının müdafiəsi sahəsində etibarlı təminat sistemi yaradılıb».
Z.İsayev həmçinin qeyd edib ki, İstehlak Bazarına Nəzarət üzrə Dövlət Xidməti tərəfindən istehlakçıların hüquqlarının qorunması ilə bağlı bir sıra tədbir həyata keçirilib. Belə tədbirlərdən olan istehlak bazarında keçirilən monitorinq və yoxlamalar zamanı normativ-texniki sənədlərin tələblərinə cavab verməyən, saxlama müddəti keçmiş, mənşəyi məlum olmayan xeyli miqdarda yeyinti məhsulu aşkar edilərək dövriyyədən çıxarılıb. Bundan başqa, istehlakçıların maarifləndirilməsi məqsədilə istehlakçı hüquqlarına dair 11 adda 15 mindən artıq plakat, 10 adda 17 mindən çox yaddaş kitabçası hazırlanaraq Bakı və ölkənin regionlarında əhaliyə, ticarət, ictimai-iaşə, məişət və digər xidmət obyektlərinə paylanılıb. Bu müddət ərzində sahibkarlıq subyektlərinə mövcud ticarət qaydalarından irəli gələn tələblərin təmin edilməsi ilə bağlı müxtəlif mövzularda 5 mindən artıq bildiriş paylanılıb.
Z.İsayev onu da vurğulayıb ki, bütün bunlara baxmayaraq, istehlakçı hüquqlarının qorunması sahəsində müəyyən problemlər hələ də qalmaqdadır: «Buna görə də, mövcud çatışmazlıqların aradan qaldırılması üçün inzibati tədbirlərin gücləndirilməsi ilə yanaşı, sahibkarlar arasında təbliğat-təşviqat və maarifləndirmə işlərinin genişləndirilməsi mühüm əhəmiyyət kəsb edir».
Qeyd edək ki, konfransda aidiyyəti dövlət qurumları, beynəlxalq və ictimai təşkilatların nümayəndələri və sahibkarlar iştirak edir.