Sahibkarlıq

Ana səhifə

Sahibkarlıq

Yanvar-fevral aylarında Azərbaycanda investorlar 113 səhmdar cəmiyyəti üzrə 51 şikayət ərizəsi verib

29 mart 2009 07:59 (UTC +04:00)

Bakı. Nicat Mustafayev – APA-Economics. Bu ilin yanvar-fevral ayları ərzində Azərbaycanda 2,1 mln. manat məbləğində ipoteka krediti üzrə 23 ipoteka kağızının dövlət qeydiyyatı həyata keçirilib.
Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, hesabat dövründə investorların hüquqlarının müdafiəsi ilə əlaqədar olaraq QKDK-ya 113 səhmdar cəmiyyəti üzrə 51 şikayət ərizəsi daxil olub. Komitə tərəfindən aparılan araşdırmaların nəticələrinə əsasən, 3 400 manat məbləğində 16-sı səhmdarların hüquqlarının müdafiəsi, 1-i isə lotereya haqqında qanunvericiliyin pozulmasına görə, ümumilikdə 17 inzibati cərimə tətbiq edilib. Hesabat dövrü ərzində bir peşəkar iştirakçının diler fəaliyyəti üzrə xüsusi razılığının (lisenziyasının) qüvvədə olma müddəti bitib, digər bir peşəkar iştirakçının broker və diler fəaliyyətləri üzrə xüsusi razılıqlarının (lisenziyalarının) fəaliyyəti bərpa edilib və bununla da qüvvədə olan qiymətli kağızlar bazarında peşəkar fəaliyyətin həyata keçirilməsinə dair xüsusi razılıqların (lisenziyaların) sayı 34-ə çatıb.
Bundan başqa, QKDK tərəfindən qiymətli kağızlar bazarında peşəkar fəaliyyət növləri ilə məşğul olmaq üçün 8 ixtisas şəhadətnaməsi verilib. Sistem risklərinin aradan qaldırılması məqsədilə qiymətli kağızlar bazarında müntəzəm olaraq həyata keçirilən nəzarət tədbirləri çərçivəsində peşəkar fəaliyyətin əlamətlərini özündə əks etdirən, lakin xüsusi razılıq (lisenziya) olmadan fəaliyyət göstərən şirkətlərin müəyyənləşdirilməsi və qiymətlərlə manipulyasiyaların qarşısının alınması istiqamətində araşdırmalar aparılaraq müvafiq tədbirlər görülüb.