Sahibkarlıq

Ana səhifə

Sahibkarlıq

Bakıda Azərbaycan-Almaniya biznes-forumu keçirilir

31 mart 2009 09:49 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan-Almaniya biznes-forumu işə başlayıb. Tədbir Azərbaycan İqtisadi İnkişaf Nazirliyinin dəstəyi və Azərbaycanda İxracın və İnvestisiyaların Təşviqi Fondunun (Azpromo) təşkilatçılığı ilə keçirilir.
«APA-Economics»in məlumatına görə, tədbirdə çıxış edən İqtisadi İnkişaf Nazirliyi aparatının rəhbəri Samir Vəliyev biznes-forum iştirakçılarına ölkənin iqtisadi inkişafından məlumat verib və qeyd edib ki, 2008-ci il ərzində Azərbaycan qlobal maliyyə böhranı fonunda nisbətən davamlı ölkələr sırasında olub: «Böhran dövründə bir sıra ölkə iqtisadi tənəzzülə uğrayıb, bir çox müəssisə iflasa uğrayaraq bağlanıb və digər problemlər yaşanıb. Lakin Azərbaycanda analoji hadisələr və vəziyyət müşahidə olunmayıb».
S.Vəliyev həmçinin qeyd edib ki, ötən il Azərbaycanda ümumi daxili məhsulun (ÜDM) artım tempi 10,8%, bu ilin ilk iki ayı ərzində isə artım 3,4% təşkil edib: «Qeyri-neft sektorunda artım 14% olub, özəl sektorun ÜDM-də xüsusi çəkisi isə 85%-ə çatıb». Nazirlik aparatının rəhbərinin sözlərinə görə, ölkədə qeyri-neft sektoru daha da inkişaf etdirilməli, rəqabətə davamlı mühit yaradılmalıdır.
S.Vəliyev onu da bildirib ki, ötən müddət ərzində Almaniya Azərbaycanda texniki layihələrin icrasına 44 mln. avro ayırıb: «Ötən dövr ərzində Almaniya Azərbaycana 245 mln. avro həcmində kredit və 24 mln. qrant ayırıb».
İki ölkə arasında ticarət dövriyyəsinə gəldikdə isə, S.Vəliyev qeyd edib ki, 2008-ci ildə ticarət dövriyyəsi 804 mln. ABŞ dolları təşkil edib və 2007-ci illə müqayisədə bu göstərici 64% artıb.
Tədbirdə çıxış edən Almaniyanın Azərbaycandakı səfiri Per Stankina bildirib ki, Azərbaycan Almaniya müəssisələri üçün əlverişli ölkələrdən biridir. Belə ki, burada iqtisadi artım hər il 25%-dən az olmayıb, bu il ərzində isə həmin göstəricinin 10%-dən aşağı olmayacağı proqnozlaşdırılır.
Almaniyanın iqtisadi potensialından məlumat verən səfir həmçinin bildirib ki, Almaniya Azərbaycana keyfiyyətli və eyni zamanda dünyada tanınan mal və məhsullarını təklif edir.
Tədbirdə iştirak edən Almaniyanın Federal İqtisadiyyat və Texnologiya Nazirliyinin Rusiya, Ukrayna, Belarus, Moldova, Mərkəzi Asiya və Qafqaz ölkələri üzrə referenti xanım Margit Şteffel qeyd edib ki, bu biznes-forum iki ölkə arasında körpü rolunu oynayacaq və tərəflər arasında əməkdaşlığın inkişafına öz töhfəsini verəcək. M.Şteffel onu da bildirib ki, Almaniya tərəfinin statistik göstəricilərinə əsasən, Azərbaycan bu ölkənin neft-qaz idxalının ümumi həcmində 6-cı yeri tutur, bu da çox yüksək göstəricidir.
Forumda həmçinin Azərbaycan İnvestisiya Şirkətinin (AİŞ) icraçı direktoru Əfqan İsayev şirkətin potensialı və imkanlarından, Azpromo-nun prezidenti Rəhim Hüseynov isə fondun fəaliyyət prinsipləri və potensialından tədbir iştirakçılarına məlumat verib.
Qeyd edk ki, biznes-forumda Almaniya iqtisadiyyatının müxtəlif sahələrində fəaliyyət göstərən 20, Azərbaycan tərəfindən isə 40 şirkət iştirak edir. Forum çərçivəsində tərəflər arasında əməkdaşlıq birjası və ikitərəfli görüşlər keçiriləcək.