Sahibkarlıq

Ana səhifə

Sahibkarlıq

Bakıda Azərbaycan-Latviya biznes-forumu keçirilir

17 aprel 2009 10:20 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin təşkilatçılığı ilə Bakıda Azərbaycan-Latviya biznes-forumu işə başlayıb. «APA-Economics»in məlumatına görə, tədbirdə çıxış edən Azərbaycanın iqtisadi inkişaf nazirinin müavini Niyazi Səfərov ölkənin iqtisadi inkişafından danışıb. Nazir müavini qeyd edib ki, ötən il ərzində ölkədə ümumi daxili məhsulun (ÜDM) artım tempi 10,8% təşkil edib: «Son 18 il ərzində Azərbaycana yatırılan investisiyaların həcmi 60 mlrd. ABŞ dolları təşkil edib. Ötən il ərzində isə yatırılan investisiyaların həcmi 11 mlrd. dollardan çox olub ki, bunun da təxminən 70%-ni birbaşa sərmayələr təşkil edib».

N. Səfərov, həmçinin, bildirib ki, sahibkarlığın və regionların inkişafı Azərbaycan üçün prioritet sahələrdir: “Son 5 il ərzində Azərbaycanda 27 min müəssisə və 770 min iş yeri yaradılıb. Yeni iş yerlərinin 550 mini daimidir və 80%-i ölkə regionlarının payına düşür. Əgər 2002-ci ildə ölkədə yoxsulluğun səviyyəsi 47,7% təşkil edirdisə, 2008-ci ildə bu göstərici 13,2%-ə enib».

Azərbaycan və Latviyanın iqtisadi əlaqələrindən danışan N. Səfərov qeyd edib ki, ötən il iki ölkə arasında ticarət dövriyyəsi 8 mln. dollar təşkil edib: «Ümid edirəm ki, hər iki tərəf ticarət dövriyyəsinin həcmini yaxşılaşdırılması üçün lazım olan tədbirlər görəcək».

Öz növbəsində, tədbirdə çıxış edən Latviyanın xarici işlər naziri Maris Riekstinş ölkəsinin inkişafı və potensialından danışıb, bildirib ki, Latviya hökumətinin prioritet saydığı sahələrindən bir də sahibkarlığın inkişafıdır: «Biz azərbaycanlı iş adamlarını Latviyada görməyimizə şad olardıq. Bizim üçün sahibkarlığın inkişafı, yeni layihələrdə iştirak və investisiya yatırmaq əsas amillərdəndir».

M. Riekstinş onu da bildirib ki, ötən il ərzində Azərbaycandan Latviyaya ixrac olunan məhsulların həcmi 30%, Latviyadan Azərbaycana gətirilən məhsulların həcmi isə iki dəfə artıb.

Qeyd edək ki, Latviya nümayəndə heyətinə 13 şirkətin nümayəndələri daxildir. İş adamları təhlükəsizlik sistemləri, İKT, qida sənayesi, maliyyə, o cümlədən bank sahələrini təmsil edir. Azərbaycan tərəfindən isə biznes-foruma analoji sahələrdə fəaliyyət göstərən 30-40 şirkətdən nümayəndələr qatılıb. Biznes-forum çərçivəsində Azərbaycan və Latviya iş adamları arasında ikitərəfli görüşlərin keçirilməsi nəzərdə tutulur.