Sahibkarlıq

Ana səhifə

Sahibkarlıq

Azərbaycan paytaxtında «Əmtəə nişanları və sənaye nümunələri» mövzusunda seminar keçirilib

22 aprel 2009 10:22 (UTC +04:00)

Bakı. Rəşad Süleymanov – APA-Economics. Bu gün Bakıda Azərbaycan Standartlaşdırma, Metrologiya və Patent üzrə Dövlət Komitəsi (SMPDK) və Ümumdünya Əqli Mülkiyyət Təşkilatının təşkilatçılığı ilə «Əmtəə nişanları və sənaye nümunələri» mövzusunda seminar keçirilib. «APA-Economics»in məlumatına görə, SMPDK mərkəzi aparatının rəhbəri Arif Əşrəfov bildirib ki, seminar 26 aprel - Ümumdünya Əqli Mülkiyyət Gününə həsr olunub. Hazırda Azərbaycanın əqli mülkiyyətin mühafizəsi sahəsində dünyanın bir çox təşkilatları ilə əməkdaşlıq etdiyini qeyd edən A.Əşrəfov ölkə daxilində də qanunvericilik bazasının yaradılması, hüquqi-normativ aktların qəbulu sahəsində işlərin görüldüyünü qeyd edib.
ÜƏMT-in nümayəndəsi Sergey Zlotin isə qeyd edib ki, seminarda əmtəə nişanları və sənaye nümunələri ilə bağlı beynəlxalq təcrübə, həmçinin milli sektorda görülən işlər müzakirə olunacaq.
SMPDK-in patent şöbəsinin müdiri Miryaqub Seyidov Azərbaycanın 1998-ci ildə «Əmtəə nişanları və coğrafi göstəricilər haqqında» qanun və buna müvafiq normativ-hüquqi sənədlər qəbul etdiyini, ÜƏMT-in 9 saziş və konvensiyasına qoşulduğunu vurğulayıb.
Ötən il Komitəyə əmtəə nişanlarının qeydiyyatı ilə bağlı 3 320 iddia sənədinin daxil olduğunu deyən M.Seyidov bunun 932-nin milli iddialar olduğunu qeyd edib.
Komitə rəsmisinin sözlərinə görə, xarici ölkələrdən Azərbaycana iddia sənədi ən çox Rusiya (384) və Almaniyadan (278) daxil olub. Ötən il 654-ü milli, 863-ü isə xarici olmaqla əmtəə nişanı qeydiyyata alınıb, 25 patent (17-si milli, 8-i xarici iddiaçılara) verilib. Həmçinin, 27 milli və 30 sənaye nümunəsinə dair iddia sənədi təqdim olunub.
Qeyd edək ki, iki gün davam edəcək seminarda milli və beynəlxalq səviyyələrdə əmtəə nişanları və sənaye nümunələrinin mühafizəsi, əmtəə nişanlarının beynəlxalq qeydiyyatının Madrid sistemi, əqli mülkiyyət hüquqlarının məcburi həyata keçirilməsi və s. məsələlər müzakirə olunacaq.