Sahibkarlıq

Ana səhifə

Sahibkarlıq

Azərbaycanın Gəncə-Qazax iqtisadi rayonu üzrə «Regionlarda sahibkarlığın inkişafına dövlət dəstəyi» mövzusunda tədbir keçirilib

01 may 2009 12:32 (UTC +04:00)

Bakı. Rəşad Süleymanov – APA-Economics. İqtisadi İnkişaf Nazirliyinin Sahibkarlığa Kömək Milli Fondunun (SKMF) təşkilatçılığı ilə bu gün Qazax rayonunda Gəncə-Qazax iqtisadi rayonunda fəaliyyət göstərən sahibkarlar üçün «Regionlarda sahibkarlığın inkişafına dövlət dəstəyi» mövzusunda tədbir keçirilib. Bu barədə «APA-Economics»ə İqtisadi İnkişaf Nazirliyinin mətbuat xidmətindən məlumat verilib.
Tədbir çərçivəsində Gəncə-Qazax iqtisadi rayonunda fəaliyyət göstərən və SKMF-in vəsaitləri hesabına güzəştli kredit almış müəssisələrin məhsul və xidmətlərinin sərgisi təşkil olunub. Həmçinin, «SKMF-in vəsaitləri hesabına güzəştli kreditlərin verilməsi üçün sahibkarlıq subyektləri tərəfindən təqdim edilən investisiya layihələrinin hazırlanması və qiymətləndirilməsi» mövzusunda treninq keçirilib. Gəncə-Qazax regionundan olan 300-ə yaxın sahibkar və biznesə yeni başlamaq istəyənlərin iştirak etdiyi treninqdə biznes ideyalarının formalaşdırılması, investisiya layihələrinin hazırlanması və güzəştli kreditlərdən istifadə qaydaları barədə geniş məlumat verilib və sahibkarları maraqlandıran suallar cavablandırılıb.
Tədbirdə Şəmkir rayonunda faraş tərəvəz məhsullarının yetişdirilməsi üçün istixanaların yaradılmasını nəzərdə tutan bu layihənin maliyyələşdirilməsi üçün SKMF-in vəsaitləri hesabına «Azaqro» MMC-yə 3 mln. manat məbləğində güzəştli kredit ayrılıb. Ən müasir avadanlıqlarla təchiz ediləcək müəssisədə məhsul yetişdirilməsi tamamilə yeni texnologiyaya əsaslanacaq: torpaqsız yetişdirmə qablarından, plastik borular vasitəsilə məhsuldarlığın 40% artımına şərait yaradan damcı suvarma sistemindən istifadə ediləcək, bütünlükdə istehsal və qablaşdırma prosesləri (istilik, havalandırma, gübrələrin miqdarının müəyyənləşdirilməsi və s.) avtomatik idarə olunacaq. Müəssisə tam gücü ilə fəaliyyətə başladıqdan sonra ildə 1 000 ton faraş tərəvəz istehsal ediləcək. «Azaqro» MMC-də istehsal olunan məhsulun təxminən 80%-i ixrac olunacaq.
Ümumilikdə, bu gün keçirilmiş tədbir çərçivəsində SKMF-in vəsaitləri hesabına 6 müvəkkil kredit təşkilatı vasitəsilə Qazax, Tovuz, Ağstafa, Şəmkir və Samux rayonlarında fəaliyyət göstərən 61 sahibkarın investisiya layihələrinin maliyyələşdirilməsinə 3,3 mln. manat məbləğində güzəştli kredit ayrılıb.
Qeyd edək ki, cari ilin ötən dövründə SKMF-dən müvəkkil kredit təşkilatları vasitəsilə sahibkarlara 20 mln. manata yaxın güzəştli kredit verilib. Güzəştli kreditlər hesabına maliyyələşdirilmiş layihələrin həyata keçirilməsi nəticəsində 1 500-dən çox yeni iş yerinin açılması nəzərdə tutulur.