Sahibkarlıq

Ana səhifə

Sahibkarlıq

ATİB: Azərbaycan faktorinq bazarının yaxın gələcəkdə inkişaf edəcəyi gözlənilmir

04 may 2009 07:06 (UTC +04:00)

Bakı. Nicat Mustafayev – APA-Economics. Azərbaycanın faktorinq bazarı olduqca aşağı səviyyədə inkişaf edib. «APA-Economics»in məlumatına görə, bu barədə Azərbaycan-Türkiyə İş Adamları Birliyinin (ATİB) hazırladığı maliyyə hesabatında bildirilir.
Hesabata əsasən, 2008-ci ilin ilk 9 ayı ərzində Azərbaycan Mərkəzi Bankın hesabatlarında kredit əməliyyatlarının strukturunda faktorinq əməliyyatlarının həcmi 1%-dən aşağı olmaqla bərabər, bu rəqəm 1-2 bankın həyata keçirdiyi bir neçə əməliyyatı əks etdirir: «Faktorinq əməliyyatlarına ehtiyacın böyük olmasına baxmayaraq, bu əməliyyatların bazar həcmi çox kiçikdir. Bunun əsas səbəblərindən biri hüquqi şəxslərin borclarının özgəninkiləşdirilməsi sahəsinin qanunvericiliklə kifayət qədər tənzimlənmədiyidir. Digər səbəblər kimi özəl şirkətlərin əksəriyyətinin ümumiyyətlə belə alətlərin mövcudluğundan xəbərsiz olmasını, banklarda faktorinq üzrə mütəxəssislərin az olması və cəmiyyətdə borcun satılması praktikasının adekvat qəbul edilməməsi ilə bağlıdır. Bu bazarın inkişaf etdirilməsi üçün uzunmüddətli və hərtərəfli tədbirlərin həyata keçirilməsi vacibdir. Lakin hadisələrin gedişi bu bazarın yaxın gələcəkdə inkişaf edəcəyini deməyə əsas vermir».
Hesabatda həmçinin, daxili faktorinq əməliyyatlarını stimullaşdırmaq və bununla da xarici faktorinq əməliyyatları üçün təcrübə toplamaq, faktorinq maliyyələşməsi zamanı kreditor öz borcunu qaytarmadığı halda, borcun alınması üçün hüquqi proseduraları sadələşdirmək, faktorinq üzrə maarifləndirmə işləri aparmaq, faktorinqə aid olacaq qanunvericilik bazasını təkmilləşdirmək və bu kimi tövsiyələr əksini tapıb.