Sahibkarlıq

Ana səhifə

Sahibkarlıq

Azərbaycan paytaxtında bir sıra qida məhsullarının istehsalında nöqsanlar aşkar edilib

12 may 2009 15:41 (UTC +04:00)

Bakı. Vahab Rzayev – APA-Economics. Azərbaycan Standartlaşdırma, Metrologiya və Patent üzrə Dövlət Komitəsi tərəfindən Bakı şəhərində qida məhsulların istehsalı və markalanması üzrə araşdırmalar aparılıb. Komitədən «APA-Economics»ə verilən məlumatına görə, yoxlamalar nəticəsində, meyvə şirələri istehsalı ilə məşğul olan «Can-Pa» MMC-də standartların tələbinə, metroloji qayda və normalara riayət olunmasının səviyyəsi araşdırılıb və laborator müayinə nəticəsində «Can Su» əmtəə nişanlı «Portağal» meyvə içkisinin tərkibində bağırsaq çöpü qrupundan olan bakteriyalar aşkarlanıb, məhsulun fiziki-kimyəvi göstəriciləri normativ sənədin tələblərinə cavab vermədiyi müəyyənləşib. Müəssisədə «Portağal» meyvə şirəsinin istehsalı və satışının qadağan olunması barədə qanunvericiliyə uyğun olaraq tədbirlər görülür.
Bundan başqa, Komitənin əməkdaşları paytaxtın Bakıxanov qəsəbəsində ərzaq məhsullarının qablaşdırılması ilə məşğul olan fiziki şəxs Etibar Musayevin rəhbərlik etdiyi müəssisədə monitorinq aparıblar. Müəssisədə qablaşdırılan «Zlato» əmtəə nişanlı ərzaq məhsullarının markalanmasının normativ sənədin tələbinə uyğun aparılmadığı müəyyən olunub. Hazırda müəssisədə qanun pozuntularının qarşısının alınması ilə bağlı müvafiq tədbirlər görülür.
Eyni zamanda, istehlak mallarının idxalı və satışı zamanı standartların tələblərinə, metroloji qayda və normalara riayət olunmasını araşdırmaq üçün Komitə tərəfindən «Komtex» MMC-də yoxlamalar aparılıb. Nəzarət edilməsi vacib olan məhsulların gizlədilməsinə görə adıçəkilən müəssisə tərəfindən idxal olunan məhsulların satışı qadağan edilib, inzibati protokol tərtib edilib. Müvafiq tədbirlərin görülməsi üçün sənədlər hüquq-mühafizə orqanlarına göndəriləcək.
Həmçinin, Bakının Nəsimi rayonu ərazisində fiziki şəxs statusu ilə sahibkarlıq fəaliyyəti göstərən Səyyarə Qəhrəmanovanın rəhbərlik etdiyi müəssisədə dondurma istehsalı zamanı standartların tələblərinə, metroloji qayda və normalara riayət olunması araşdırılıb. Araşdırma zamanı bir sıra nöqsanlarla yanaşı, hazır məhsulun tərkibində bağırsaq çöpü qrupundan olan bakteriyalar aşkar edilib. Hazırda təsərrüfat subyektində dondurma istehsalı və satışının qadağan olunması ilə bağlı müvafiq tədbirlər görülür.
Əlavə olaraq, süd məhsullarının istehsalı ilə məşğul olan «Amal» firmasında dövlət nəzarəti tədbirləri həyata keçirilərkən ciddi nöqsanlar aşkar olunub. Belə ki, istehsal olunan məhsuldan götürülən nümunələr sınaq laboratoriyasında müayinə olunub, nəticədə «əla növ pəhriz kəsmiyi» və «xama» məhsullarında bağırsaq çöpü qrupundan olan bakteriyalar aşkarlanıb. Bundan başqa, süd məhsullarının istehsalında bitki yağından istifadə olunduğu barədə məlumat markalanma zamanı nəzərə alınmayıb.