Sahibkarlıq

Ana səhifə

Sahibkarlıq

Bakıda Azərbaycan-Kuba hökumətlərarası komissiyasının iclası keçirilib

19 may 2009 10:17 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan-Kuba iqtisadi əməkdaşlıq üzrə hökumətlərarası komissiyasının II iclası keçirilib.

«APA-Economics»in məlumatına görə, tədbirdə çıxış edən komissiyanın Azərbaycan tərəfindən həmsədri mədəniyyət və turizm naziri Əbülfəz Qarayev qeyd edib ki, iki ölkə arasında əməkdaşlıq 2006-cı ildən davam etdirilir: «Kubanın nümayəndə heyəti səfər çərçivəsində Azərbaycanın bir sıra bölgələrini də ziyarət edib və orada aparılan islahatlarla yaxından tanış olublar. Belə ki, Lənkəranda olan nümayəndə heyəti qida məhsulları, diaqnostika, təhsil və bu kimi müəssisələrdə olublar».

Nazir həmçinin qeyd edib ki, Kubanın nümayəndə heyəti Azərbaycan Mədəniyyət və Turizm, Sənaye və Energetika, Səhiyyə, Gənclər və İdman nazirliklərində də görüşlər keçirib: «Bu gün ərzində isə Kubanın nümayəndə heyəti Azərbaycanın baş nazirinin birinci müavini Yaqub Eyyubovla görüşəcək». Ə.Qarayevin sözlərinə görə, iki ölkə arasında hazırkı ticarət dövriyyəsinin həcmi yüksək olmasa da, əməkdaşlıq istiqamətlər perspektivlidir.

Tədbirdə çıxış edən komissiyanın kubalı həmsədri, Kubanın xarici ticarət və investisiya nazirinin müavini Rikardo Qerero bildirib ki, iki ölkə arasında əməkdaşlığın ilkin mərhələdə olmasına baxmayaraq, Azərbaycan və Kuba arasında əlaqələr əhəmiyyətli dərəcədə inkişaf edib: «İki ölkə arasında 2006-cı ildən etibarən bir sıra saziş imzalanıb. Yaxın gələcəkdə isə Azərbaycanla Kuba arasında energetika, ticarət, səhiyyə, idman və bu kimi sahələri əhatə edən sazişlərin imzalanacağı gözlənilir».

Qeyd edək ki, tədbirin sonunda iki ölkə arasında əməkdaşlıq sazişi imzalanıb. Sazişdə Azərbaycan və Kuba arasında mədəniyyət və turizm, statistika mübadiləsi, rabitə və informasiya texnologiyaları, sənaye və energetika və bir sıra digər sahələrdə əməkdaşlığın aparılması kimi bəndlər əksini tapıb. Sözügedən işlər yaxın bir il ərzində həyata keçiriləcək.

Xatırladaq ki, Azərbaycan-Kuba iqtisadi əməkdaşlıq üzrə hökumətlərarası komissiyasının I iclası 2007-ci ildə Havanada keçirilib.