Sahibkarlıq

Ana səhifə

Sahibkarlıq

Azərbaycanın ticarət və xidmət şəbəkələrindən satışın həcmi yanvar-aprel aylarında 9,9% artıb

20 may 2009 08:39 (UTC +04:00)

Bakı. Nicat Mustafayev – APA-Economics. Bu ilin yanvar-aprel aylarında Azərbaycanın ticarət və xidmət şəbəkələrində 4 777,7 mln. manatlıq və ya 2008-ci ilin eyni dövrü ilə müqayisədə 9,9% çox istehlak malları satılıb və pullu xidmətlər göstərilib.

Dövlət Statistika Komitəsindən «APA-Economics»ə verilən məlumata görə, artımın 64,1%-i ticarət fəaliyyəti, 35,9%-i əhaliyə göstərilən pullu xidmətlərin hesabına təmin edilib.

Hesabat dövründə əhalinin alıcılıq qabiliyyətinin yüksəlməsi müşahidə olunub. Belə ki, ticarət və xidmət şəbəkələrindən hər bir ölkə sakini hər ay orta hesabla 138,4 manatlıq və ya 18,7 manat çox müxtəlif istehlak malları alıb və pullu xidmətlərdən istifadə edib.

Bundan başqa, 2009-cu ilin yanvar-aprel aylarında özəl müəssisələr tərəfindən 4 438,3 mln. manatlıq istehlak malları satılıb və pullu xidmətlər göstərilib, pərakəndə əmtəə dövriyyəsinin və əhaliyə göstərilən pullu xidmətlərin real artımının 82,1%-i bu müəssisələrin fəaliyyəti hesabına təmin edilib.

Qeyd edək ki, 2009-cu ilin yanvar-aprel aylarında istehlakçılara (ixrac da daxil olmaqla) 2 mln. ton neft məhsulları göndərilib Bunun 57%-i daxili bazarın tələbatının ödənilməsinə yönəldilib, 43%-i isə ixrac olunub. Neft məhsullarının 37,3%-ni dizel yanacağı, 18,6%-ni avtomobil benzini, 12,9%-ni aviasiya üçün və sair ağ neft, 10,3%-ni mazut yanacağı, 3,3%-ni neft bitumu, 3%-ni mayeləşdirilmiş qazlar, 0,3%-ni sürtgü yağları, 14,3%-ni isə digər məhsullar təşkil edib.