Sahibkarlıq

Ana səhifə

Sahibkarlıq

ADA Şirkətlər Qrupu Direktorlar Şurasının iclası keçirilib

22 may 2009 10:29 (UTC +04:00)

Bakı. Nicat Mustafayev – APA-Economics. Bu gün Bakıda ADA Şirkətlər Qrupu ilə Dünya Bankı qrupunun üzvü olan Beynəlxalq Maliyyə Korporasiyası (IFC) arasınja əməkdaşlığın yeni inkişaf mərhələsinə dair mətbuat konfransı keçirilib.

«APA-Economics»in məlumatına görə, tədbirdə çıxış edən ADA Şirkətlər Qrupu İdarə Heyətinin sədri Rəfayil Hacıyev qeyd edib ki, mayın 21-də Bakıda ADA-nın Direktorlar Şurasının növbəti toplantısı keçirilib: «Toplantıda 2009-cu ilin ilk 4 ayının nəticələri, «Almalı» supermarketlər şəbəkəsinin inkişaf perspektivləri, texnoloji yeniliklərin tətbiqi və xüsusi istehsalın təşkili kimi məsələlər müzakirə olunub».

Tədbir çərçivəsində R.Hacıyev həmçinin şirkətin fəaliyyətindən və yaxın gələcəkdə planlarından danışaraq qeyd edib ki, hazırda «Almalı» supermarketləri Bakı (35), Sumqayıt (3) və Gəncə (2) şəhərlərində fəaliyyət göstərir: «Yaxın gələcəkdə biz şəbəkəni genişləndirərək Şirvan, Mingəçevir, Yevlax, Şəmkir və Tovuz kimi şəhər və rayonlarda yeni mağazalarımızı açmaq niyyətindəyik. Cari ilin sonunadək biz 5 yeni «Almalı» supermarketi açacağıq ki, bunların əksəriyyəti ölkənin regionlarında yerləşəcək».

Tədbirdə çıxış edən ADA-nın Direktorlar Şurasının sədri Sergey İvaşkeviç isə öz növbəsində bildirib ki, bu ilin sentyabr ayında şirkətin 4 yaşı tamam olacaq: «Bu müddət ərzində biz göstərdiyimiz xidmətlərin keyfiyyətini artırmışıq. Hazırda «Almalı» marketlərində gündə 40 min müştəriyə xidmət göstərilir». Dünyada müşahidə olan maliyyə böhranının bir çox ölkələrə təsirindən danışan S.İvaşkeviç qeyd edib ki, Azərbaycan böhrandan ən az zərər çəkmiş ölkələr sırasındadır.

Bundan başqa, tədbirdə çıxış edən ADA Şirkətlər Qrupunun Direktorlar Şurasına yeni üzv təyin olunmuş, IFC-nin nümayəndəsi Yazqan Musannif qeyd edib ki, gələcək illərdə IFC və ADA əməkdaşlığı davam etdirəcək: «Ümumiyyətlə, biz əhaliyə göstərilən xidmətlərimizin keyfiyyətini yaxşılaşdırıb şəbəkəmizi ölkənin digər bölgələrində də genişləndirəcəyik».

Tədbirdə çıxış edən ADA-nın baş icraçı direktoru Mobil Şərifov isə öz növbəsində şirkətin inkişaf prioritetlərindən danışıb, onun əsas məqsədinin Azərbaycana müasir ticarət mədəniyyətinin gətirilməsi olduğunu bildirib. Şirkətin planlarından danışan M.Şərifov onu da qeyd edib ki, əgər 2005-ci ilin noyabr ayında Bakıda cəmi 1 «Almalı» marketi var idisə, artıq indi ölkənin 3 şəhərində marketlərin sayı 40-a çatıb.

Qeyd edək ki, ADA Şirkətlər Qrupu 2005-ci ilin sentyabr ayından fəaliyyət göstərir. Hazırda Qrup 50 mln. ABŞ dollarına yaxın özəl kapitala, həmçinin regionda ən müasir Xüsusi Paylayıcı Mərkəzə Malikdir. Mərkəz məhsulların qəbulu, saxlanması və paylaşdırılmasını müasir dünya standartlarına uyğun həyata keçirir.