Sahibkarlıq

Ana səhifə

Sahibkarlıq

Azərbaycan Sahibkarlar Konfederasiyası regionların inkişaf perspektivləri ilə bağlı konfrans keçirib

22 may 2009 11:07 (UTC +04:00)

Bakı. Elnur Hüseynquluyev – APA-Economics. Bu gün Bakıda Azərbaycan Sahibkarlar (İşəgötürənlər) Təşkilatları Milli Konfederasiyası (ASK) «Azərbaycan Respublikası regionlarının 2009-2013 illər üçün sosial-iqtisadi inkişafı Dövlət Proqramının icrasında sahibkarların rolu» mövzusunda konfrans keçirib.

«APA-Economics»in məlumatına görə, tədbirdə İqtisadi İnkişaf və Vergilər nazirliklərinin nümayəndələri, həmçinin Bakı və regionlardan dəvət olunmuş sahibkarlar iştirak ediblər.

Konfransda ASK-nın prezidenti vəzifəsini icra edən Etibar Əliyev 2004-2008-ci illər ərzində həyata keçirilmiş Regionların sosial-iqtisadi inkişafı Dövlət Proqramının əhəmiyyətindən, bunun özəl sektorun inkişafına göstərdiyi təsirlərdən və nəticələrindən danışıb.

Konfransda qəbul edilmiş yeni Dövlət Proqram çərçivəsində sahibkarların ictimai birliyi olaraq ASK-nın fəaliyyət istiqamətləri və gələcək planları haqqında məlumat verilib.

Tədbirdə Vergilər Nazirliyi Vergi siyasəti və strateji araşdırmalar Baş İdarəsinin rəis müavini Həmid Zeynalov sahibkarlığın stimullaşdırılması məqsədi ilə ötən illər vergi qanunvericiliyinə mühüm dəyişikliklərin edildiyini bildirib.

Bu sahədə görülən işlərin davamı olaraq Vergi Məcəlləsinə əlavə və dəyişikliklər haqqında müvafiq qanun layihəsi aidiyyəti üzrə təqdim olunub. Həmin layihəyə mənfəət vergisinin 22%-dən 20%-ə, fiziki şəxslərin gəlir vergisinin maksimal dərəcəsinin 35%-dən 30%-ə endirilməsi və sahibkarlığın təşviqi ilə bağlı digər təkliflər daxil edilib.

«Vergi qanunvericiliyinin təkmilləşdirilməsi ilə yanaşı vergi inzibatçılığının sadələşdirilməsi və vergi ödəyicilərinə göstərilən elektron xidmətlərin genişləndirilməsi istiqamətində mühüm işlər görülüb. Bu işlər sırasında elektron bəyannamə sisteminin tətbiqini xüsusi ilə qeyd etmək olar», - deyə H.Zeynalov vurğulayıb.

Tədbirin sonunda sahibkarların fikir və təklifləri müzakirə edilib.