Sahibkarlıq

Ana səhifə

Sahibkarlıq

İstanbulda ticarət və iqtisadi inkişaf nazirlərinin sammiti keçirilir

01 iyun 2009 12:07 (UTC +04:00)

İstanbul. Vüqar Mustafayev - APA-Economics. Bu gün İstanbulda ticarət və iqtisadi inkişaf nazirlərinin «Türkiyə-Dünya Ticarət Körpüsü-2009» sammiti başlayıb.
«APA-Economics»in Türkiyəyə ezam olunmuş əməkdaşının məlumatına görə, Türkiyə İş Adamları və Sənayeçilər Konfederasiyası (TUSKON) və Türkiyə İxracat Məclisinin (TİM) təşkilatçılığı ilə keçirilən toplantının rəsmi açılış mərasimində çıxış edən Türkiyənin xarici ticarət üzrə dövlət naziri Zəfər Çağlayan bildirib ki, bu formatda görüşlər artıq bir neçə ildir, keçirilir. Lakin əgər əvvəllər bu toplantılar Türkiyə ilə digər qitələrin ölkələrindən olan iş adamları ilə münasibətlərini əhatə edirdisə, hazırda keçirilən sammit bütün dünya ölkələrini əhatə edir: «Hazırda dünyada müşahidə olunan maliyyə böhranı şəraitində analoji tədbirlərin keçirilməsi iştirakçı dövlətlərin sahibkarları üçün mühüm əhəmiyyət kəsb edir. Məhz maliyyə böhranının yaratdığı problemlərin həlli yolları sammitin əsas müzakirə predmeti olacaq».

Dövlət naziri həmçinin qeyd edib ki, hazırda dünyanın 17-ci iqtisadiyyatına malik olan Türkiyə 2023-cü ilədək, Türkiyə cümhuriyyətinin yaradılması ərəfəsində, mövqeyini daha da gücləndirmək və ilk onluğa daxil olmaq niyyətindədir: «Türkiyə 2023-cü ilə kimi məcmu xarici ticarət dövriyyəsini 1 trl. ABŞ dollarına, o cümlədən ixracını 500 mlrd. dollara çatdırması planının dəyişməyib və bu məqsədə hətta daha qısa müddət ərzində çatmaq niyyətindəyik».

Hazırda isə Türkiyə ÜDM-nin illik həcmi 750 mlrd. dollar, xarici ticarət dövriyyəsi 335 mlrd. dollar, turizm sahəsindən əldə etdiyi gəlir 22 mlrd. dollar, son 5 ildə ölkə iqtisadiyyatına yatırılan xarici sərmayənin həcmi isə 60 mlrd. dollar təşkil edir.

Tədbirdə çıxış edən TİM başçısı Mehmet Ekşioğlu qeyd edib ki, toplantıda 37 ölkənin rəsmi nümayəndə heyəti iştirak edir. Onun sözlərinə görə, tədbirin keçirilməsində əsas məqsəd dövlətlər arasında özəl sektor səviyyəsində iqtisadi əlaqələrin gücləndirməkdir.

TUKSON-nun İdarə Heyətinin sədri Rza Nur Meral isə bildirib ki, sammit çərçivəsində 135 ölkənin 5 500 iş adamı arasında 25 minə yaxın görüşün keçirilməsi planlaşdırılır. Bunun nəticəsində 7 mlrd. dollar dəyərində müqavilələrin imzalanması gözlənilir.

Qeyd edək ki, Azərbaycan Türk Sənayeçi və İş Adamları Beynəlxalq Cəmiyyəti (TUSİAB) və Türkiyənin Azərbaycandakı səfirliyinin təşkilatçılığı ilə Azərbaycandan olan bir qrup jurnalist də sammitdə iştirak edir.