Sahibkarlıq

Ana səhifə

Sahibkarlıq

Son üç ayda Azərbaycanda 2 366 vergi ödəyicisində qanunvericiliyin pozulması faktları aşkarlanıb

08 iyun 2009 14:36 (UTC +04:00)

Bakı. Nicat Mustafayev – APA-Economics. Bu ilin martın 3-dən mayın 31-dək Azərbaycan Vergilər Nazirliyi tərəfindən keçirilmiş operativ nəzarət tədbirləri zamanı 2 366 vergi ödəyicisində qanunvericiliyin pozulması faktları aşkar edilib.

Nazirlikdən «APA-Economics»ə verilən məlumata görə, hesabat dövründə 1 167 vergi ödəyicisində nağd hesablaşmaların aparılması qaydalarının pozulması, 55 vergi ödəyicisində valyuta sərvətlərinin ödəniş vasitəsi kimi qəbul edilməsi faktları aşkar edilib. Keçirilən tədbirlər zamanı vergi orqanlarında uçota durmadan fəaliyyət göstərən 289 vergi ödəyicisi aşkar edilib, 529 vergi ödəyicisinin xüsusi razılıq (lisenziya) tələb olunan fəaliyyət növləri ilə belə razılıq (lisenziya) olmadan məşğul olması faktları müəyyən edilib.

Bundan başqa, 54 vergi ödəyicisində 56 nəfər fiziki şəxsin əmək müqaviləsi bağlamadan işə cəlb edilməsi, 127 vergi ödəyicisinin fərqlənmə nişanı olmadan avtomobil nəqliyyatı ilə sərnişin daşıması, 121 şəxs tərəfindən valyuta sərvətlərinin ictimai yerlərdə alınıb-satılması faktları aşkar olunub.

Aksiz markalarının tətbiqi vəziyyətinə nəzarət məqsədilə keçirilən tədbirlər zamanı isə 24 vergi ödəyicisində 4 311,21 manat dəyərində 1 443 ədəd aksiz markaları ilə müvafiq qaydada markalanmamış mallar aşkar edilib.