Sahibkarlıq

Ana səhifə

Sahibkarlıq

Azərbaycan paytaxtının daha bir neçə ticarət obyektində yararsız ərzaq məhsulları aşkarlanıb

09 iyun 2009 08:51 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti növbəti monitorinq keçirib.

Nazirlikdən «APA-Economics»ə verilən məlumata görə, monitorinq zamanı Bakı şəhəri, Səbayel rayonu, Badamdar qəsəbəsi 1, yeni məhəllə, 296 ünvanında «Vini International» MMC-yə məxsus «City mart» mağazasında, Badamdar şossesi, 139 ünvanında «Xəliloğlu» MMC-yə məxsus «Kamran market»də, Binəqədi rayonu, 7-ci mkr., 3123-cü məhəllədə fiziki şəxs Əhməd Əhmədova məxsus kolbasa satışı anbarında, Nəsimi rayonu, Əfəndiyev küçəsi, 8 ünvanında Şəfahət Fətullayevə məxsus topdansatış obyektində, A.Mustafayev küçəsi, 30/14 ünvanında Lətif Mehdiyevə məxsus topdansatış obyektində, həmçinin Quba rayonunda Əlihüseyn Rzayevə məxsus «Star market»də ümumi çəkisi 400 kq-a yaxın istifadə müddəti ötmüş ərzaq məhsullarının (meyvə şirələri, qənnadı və kolbasa məmulatları, kərə yağı, pendir və s.) satışının həyata keçirildiyi müəyyən olunub. Aşkar olunmuş yararsız ərzaq məhsulları satışdan çıxarılaraq məhv edilib.

Bununla əlaqədar 2 hüquqi və 4 fiziki şəxs barəsində inzibati xəta haqqında protokol tərtib edilib. Qanun pozuntusuna yol vermiş şəxslər barəsində İnzibati Xətalar Məcəlləsinə uyğun olaraq, inzibati cərimələr tətbiq olunacaq.

Qeyd edək ki, ümumiyyətlə, bu ilin mayın 17-dən İnzibati Xətalar Məcəlləsinə dəyişikliklər və əlavə edilməsi haqqında qanun qüvvəyə mindikdən sonra aparılmış nəzarət tədbirləri zamanı qanun pozuntusuna yol verdiyi müəyyən edilmiş 9 hüquqi şəxsə 32,5 min manat, 34 fiziki şəxsə isə 51,5 min manat cərimə tətbiq olunub.