Sahibkarlıq

Ana səhifə

Sahibkarlıq

«McDonalds Azerbaijan» gələn il sərmayələrini 2 dəfə artıracaq

11 iyun 2009 11:50 (UTC +04:00)

Bakı. Elnur Hüseynquluyev – APA-Economics. «McDonalds Azerbaijan» şirkəti 2010-cu ildə Azərbaycan ərazisində daha dörd yeni fast-food mərkəzi açmaq niyyətindədir. «APA-Economics»in məlumatına görə, bunu şirkətin icraçı direktoru Maqsud Mirzəyev bildirib.

M.Mirzəyevin sözlərinə görə, yeni mərkəzlərin ikisi Bakıda, biri Gəncədə, sonuncusu isə Sumqayıtda açılacaq. Bununla da şirkətin fast-food mərkəzlərinin sayı 8-ə çatdırılacaq.

«Ümumiyyətlə, bir mərkəzin istifadəyə verilməsi üçün 1,890 mln. ABŞ dolları həcmində vəsait tələb olunur. Həmin mərkəzlərin açılması üçün növbəti il ərzində ölkə iqtisadiyyatına 7,560 mln. dolar həcmində investisiya yatırılacaq. Onu da qeyd edim ki, şirkət fəaliyyət göstərdiyi müddət ərzində ölkəyə 7 mln. dollardan çox investisiya yatırımı həyata keçirib».

M.Mirzəyev bildirib ki, hazırda «McDonalds Azerbaijan» şirkətində 520 nəfər işçi çalışır ki, yaxın 18 ay ərzində işçilərin sayı 1 000 nəfərə çatacaq. İşçilərin sayının iki dəfə artmasının səbəbi isə birbaşa şəbəkənin genişləndirilməsi ilə bağlıdır. Hazırda şirkətin işçilərinin 80 nəfəri menecerlərdir və onların orta aylıq əmək haqqı 500-550 manat təşkil edir.

M.Mirzəyev daha sonra şirkətin maliyyə göstəriciləri ilə bağlı məlumat verib. Onun sözlərinə görə, 2008-ci ildə şirkət tərəfindən dövlət büdcəsinə 3,467 mln. manat həcmində vergi ödənilib. Təkcə bu ilin ilk beş ayında şirkətin vergi ödənişləri 2,021 mln. manat olub.

Şirkətin 2008-ci ildə əldə etdiyi gəlirləri açıqlamayan M.Mirzəyev yalnız gəlirlərin ötən il 8-9% artdığını vurğulayıb.

Qeyd edək ki, «McDonalds Azerbaijan» şirkəti 1999-cu ildən fəaliyyət göstərir.