Sahibkarlıq

Ana səhifə

Sahibkarlıq

Azərbaycanda ərzaq məhsulları üçün soyuducu anbar komplekslərinin yaradılması üçün investisiya layihələrinin qəbuluna başlanılıb

12 iyun 2009 12:36 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyi nəzdində Sahibkarlığa Kömək Milli Fondu (SKMF) «Regionlarda sahibkarlığın inkişafına dövlət dəstəyi» mövzusunda Yevlaxda tədbir keçirib. Nazirlikdən «APA-Economics»ə verilən məlumata görə, tədbirdə Yevlax, Bərdə və Tərtər rayonlarından 400-dən çox sahibkar iştirak edib.

Tədbir iştirakçıları əvvəlcə Yevlax rayonunda SKMF-dan müvəkkil kredit təşkilatları vasitəsilə bu yaxınlarda hər biri 2 mln. manat güzəştli kredit almış iki müəssisənin – «Lalə-Tekstil» MMC-də tikiş və trikotaj məhsullarının istehsalı prosesi və kimyəvi yuyucu vasitələr istehsal edəcək «Lalə-Kemikl» MMC-də aparılan tikinti-quraşdırma işlərinin gedişi ilə tanış olub. Bu müəssisələrin tam istehsal gücü ilə fəaliyyətinin təmin olunması Yevlaxda 700-dən çox yeni iş yerinin açılmasına imkan verəcək.

Tədbir çərçivəsində İqtisadi İnkişaf Nazirliyi sahibkarlığın inkişafı siyasəti şöbəsinin müdiri Zaur Qasımov «Sahibkarlığa dövlət dəstəyi və kənd yerlərinin inkişafı» mövzusunda məruzə ilə çıxış edib.

Bundan başqa, Yevlax rayon İcra Hakimiyyətinin başçısı Elmar Vəliyev, SKMF-ın icraçı direktoru Şirzad Abdullayev, «Lalə-Tekstil» MMC-nin rəhbəri xanım Arzu Kərimova, fermer Vüqar Əlirzayev və başqaları çıxış edərək, Azərbaycanda özəl bölmənin inkişafı istiqamətində həyata keçirilən tədbirlərdən danışıb, sahibkarlığa göstərilən böyük diqqət və qayğının ölkə rəhbərliyi tərəfindən həyata keçirilən iqtisadi siyasətin əsas istiqamətlərindən olduğunu vurğulayıblar.

Tədbir çərçivəsində SKMF-ın vəsaitləri hesabına müvəkkil kredit təşkilatları vasitəsilə Yevlax, Bərdə və Tərtər rayonlarından olan 62 sahibkara güzəştli kreditlər verilib. Ayrılmış kreditlər kənd təsərrüfatı məhsullarının və tikinti materiallarının istehsalı sahələrinin inkişafına yönəldiləcək. Güzəştli kreditlər hesabına maliyyələşdirilən layihələrin həyata keçirilməsi nəticəsində xeyli sayda yeni iş yerinin yaradılması gözlənilir.

Tədbirin sonunda SKMF-ın Müşahidə Şurası tərəfindən təsdiq edilmiş prioritet istiqamətlərə uyğun olaraq Aran, Quba-Xaçmaz, Gəncə-Qazax və Lənkəran iqtisadi rayonlarında meyvə-tərəvəz və digər ərzaq məhsullarının tədarükü, saxlanması və satışı məqsədilə beynəlxalq standartlara cavab verən hər birinin tutumu 2 000 ton olan soyuducu anbar komplekslərinin yaradılması üçün investisiya layihələrinin qəbuluna başlandığı bildirilib və müvafiq prosedura qaydaları barədə tədbir iştirakçılarına ətraflı məlumat verilərək, bu sahədə sahibkarların fəal iştirakı tövsiyə olunub.