Sahibkarlıq

Ana səhifə

Sahibkarlıq

Bakıda korporativ sosial məsuliyyətə dair yeni seminarın açılış mərasimi keçirilib

23 iyun 2009 07:28 (UTC +04:00)

Bakı. Aynur Vəliyeva – APA-Economics. Dünən Bakıda «Azercell Telecom» və Avrasiya Əməkdaşlıq Fondu korporativ sosial məsuliyyətə dair növbəti seminarın açılış mərasimini keçirib.

«APA-Economics»in məlumatına görə, Qlobal Hesabat Təşəbbüsünün hesabat şəbəkəsi və GRİ standartlarına həsr olunmuş tədbirin açılış mərasimində çıxış edən «Azercell» şirkətinin korporativ əlaqələr və sosial məsuliyyət şöbəsinin rəhbəri Ülviyyə Həsənzadə şirkətin Azərbaycanda yüksək texnologiyaların tətbiqi ilə yanaşı korporativ sosial məsuliyyət (KSM) layihələrinin uğurla həyata keçirdiyini bildirib: «Biz korporativ sosial məsuliyyətin köməyi ilə ölkədəki dəyərləri qoruyuruq, gələcək dəyərləri yaradırıq və dəyərləri paylaşırıq».

Ü.Həsənzadə ötən il Korporativ Sosial Məsuliyyətə dair «Dəyərlərə sərmayə» şüarı altında artıq ilk layihə və bir sıra digər layihələr həyata keçirilib, bu məqsədlərə 2008-ci ildə 2 mln. manat vəsait sərf olunub. Şöbə müdirinin fikrincə, Azərbaycanda hər bir şirkətin sosial məsuliyyətli biznesin həyata keçirməsinə GRİ hesabatının yayılmasına həsr olunmuş seminarların dəstək olacaq.

Tədbirdə həmçinin Avrasiya Əməkdaşlıq Fondunun korporativ sosial məsuliyyət şöbəsinin müdiri Əhəd Kazımov çıxış edib və Azərbaycanda KSM-in inkişaf etdirilməsinin vacibliyini vurğulayıb.

Mərasimin sonunda Qlobal Hesabat Təşəbbüsü təşkilatının təmsilçisi «GRİ-nin davamlı hesabat faydaları – biznes üçün strateji fayda» mövzusunda təqdimatla çıxış edib.

Qeyd edək ki, Hollandiyada yerləşən GRİ qeyri-hökumət təşkilatı dünyada ən çox istifadə olunan hesabat şəbəkəsini işləyib hazırlayıb. Hesabatın hazırlanması zamanı müəssisənin fəaliyyətinə təsir göstərən iqtisadi, ekoloji və sosial təhlilin aparılmasına, həmçinin onların istehsal etdikləri məhsulların və ya göstərdikləri xidmətlərin ətraf mühitə təsirinin qiymətləndirilməsinə diqqət yetirilir. Hazırda GRİ-nin G3 adlı qaydalarından dünyanın 65-dək ölkəsinin şirkət və təşkilatları istifadə edir. GRİ hesabatı ilk dəfə 2005-ci ildə ABŞ-ın «General Electric» şirkəti istifadə edib. Sonra bu təşəbbüsə «Ford», ABB, «Microsoft» və digər şirkətlər qoşulub.