Sahibkarlıq

Ana səhifə

Sahibkarlıq

Bakıda «Qlobal Hesabat Təşəbbüsünün davamlı hesabat təcrübələri» üzrə xüsusi təlim keçirilib

23 iyun 2009 10:16 (UTC +04:00)

Bakı. Aynur Vəliyeva – APA-Economics. Bu gün Bakıda Qlobal Hesabat Təşəbbüsünün hesabat şəbəkəsi və GRİ standartlarına həsr olunmuş «GRI-nin davamlı hesabat təcrübələri» üzrə xüsusi təlim keçirilib.

«APA-Economics»in məlumatına görə, təlimi Qlobal Hesabat Təşəbbüsü təşkilatının təmsilçisi Asthildur Rutten aparıb. Təlimdə BP, «McDermott», «Praxis», HP, «ADA Group», «Azercell», KSL, «Caspian Consulting», «Statoil» şirkətləri və Azərbaycan Mikromaliyyə Assosiasiyasının nümayəndələri iştirak ediblər.

Tədbir iştirakçıları Azərbaycanda sosial və ətraf mühitlə bağlı olan problemləri aşkar edərək bu problemlərin həllində dövlət səviyyəsində, çalışdıqları şirkət səviyyəsində və fərdi olaraq gördüyü işlər haqqında məlumat verib. Bununla yanaşı, iştirakçılar mövcud problemlərin aradan qaldırılması istiqamətində görülə biləcək tədbirləri sadalayıblar.

Mövcud problemlər arasında bəzi regionlarda içməli su qıtlığı, bəzi bölgələrdə isə sudan israfla istifadə, tullantıların vaxtı vaxtında yığışdırılması və sonrakı utilizasiya, qaz və elektrik enerjisinin bəzi hallarda qənaətlə istifadə edilməməsi kimi məsələlər gündəmə gətirilib. Qruplara bölünmüş iştirakçılar bu problemlərin həlli istiqamətində zəruri tədbirlərin görülməsinin vacibliyini vurğulayıblar.

Sonra, 5 fazadan ibarət olan GRİ hesabatlarının hazırlanması mərhələlər üzrə təsvir edilib və onun xüsusiyyətləri açıqlanıb.

Qeyd edək ki, GRİ-nin G3 adlı qaydalarından dünyanın 65-dək ölkəsində 1500 şirkət və təşkilatdan ibarət qlobal şəbəkəsi mövcuddur. Hazırda dünya üzrə G3 qaydaları de-fakto hesabat üçün qlobal standarta çevrilib. GRİ şəbəkəsinə əsaslanan davamlılıq hesabatları qanun, norma, məcəllə, fəaliyyət standartları və könüllü təşəbbüslərə hörmətlə yanaşmaqla, təşkilatların fəaliyyətinin qiymətləndirilməsində istifadə oluna bilər, bu hesabatlar təşkilatın davamlı inkişafa olan sadiqliyini nümayiş etdirir və müəyyən vaxtdan sonra təşkilatların fəaliyyətini müqayisə etməyə imkanı verir.