Sahibkarlıq

Ana səhifə

Sahibkarlıq

Bakıda Azərbaycan-Çin biznes-forumu keçirilib

23 iyun 2009 14:06 (UTC +04:00)

Bakı. Nicat Mustafayev – APA-Economics. Bakıda Ümumçin Sənayeçilər və Ticarətçilər Federasiyası və Azərbaycan Sahibkarlar Konfederasiyasının (ASK) təşkilatçılığı ilə Azərbaycan-Çin biznes-forumu keçirilib. Forum Çin iş adamlarından ibarət nümayəndə heyətinin Azərbaycana işgüzar səfəri çərçivəsində təşkil olunub.

«APA-Economics»in məlumatına görə, tədbirdə çıxış edən ASK-nın prezidenti vəzifəsini icra edən Etibar Əliyev forum iştirakçılarına Azərbaycanın iqtisadi inkişafından məlumat verib və qeyd edib ki, son 5 il ərzində ölkədə ÜDM-in həcmi 2,6 dəfə artıb. Ötən il ərzində özəl sektorun ÜDM-də payı 85%-ə, özəl sektorda məşğulluğun səviyyəsi 74%-ə çatıb. Çin iqtisadiyyatında artım templərindən xəbərdar olduğunu bildirən E.Əliyev qeyd edib ki, iki ölkə arasında iqtisadi əlaqələr 1992-ci ildən inkişaf edir: «Bu müddət ərzində iki ölkə arasında bir sıra sənədlər imzalanıb ki, bu da öz növbəsində əlaqələrin genişləndirməsində mühüm rol oynayır. Belə ki, ötən il ərzində Azərbaycan və Çin arasında ticarət dövriyyəsi 2007-ci illə müqayisədə 3 dəfə artaraq 977 mln. ABŞ dollarına çatıb».

Tədbirin açılış mərasimində çıxış edən Ümumçin Sənayeçilər və Ticarətçilər Federasiyasının vitse-prezidenti Çuan Çjeçju (Quan Zhezhu) Azərbaycanın iqtisadi inkişafından məmnun olduğunu bildirib və qeyd edib ki, iki ölkə iqtisadiyyatın bir sıra sahələri üzrə əməkdaşlıq edə bilər: «Azərbaycan və Çin arasında iqtisadi əlaqələrin genişləndirməsi üçün geniş potensial var və ümid edirəm ki, yaxın gələcəkdə iki ölkə arasında ticarət dövriyyəsi daha da artacaq».

Qeyd edək ki, tədbirdə sənaye, tikinti, mebel, ticarət və bu kimi sahələrdə fəaliyyət göstərən Azərbaycanın 30, Çinin isə 20 şirkətinin nümayəndələri iştirak edib. Tədbirin məqsədi Azərbaycan və Çin iş adamları arasında mövcud biznes əlaqələrinin gücləndirilməsi və yeni işgüzar əlaqələrin yaradılmasıdır.