Sahibkarlıq

Ana səhifə

Sahibkarlıq

IFC Azərbaycanda kiçik və orta müəssisələr üzrə hazırladığı hesabatın təqdimatını keçirib

25 iyun 2009 10:18 (UTC +04:00)

Bakı. Nicat Mustafayev – APA-Economics. Bu gün Bakıda Dünya Bankı qrupunun üzvü olan Beynəlxalq Maliyyə Korporasiyası (IFC) Azərbaycanda Biznes Mühitinin Təkmilləşdirilməsi Layihəsinin kiçik və orta müəssisələr üzrə hazırladığı hesabatın təqdimatını keçirib.

«APA-Economics»in məlumatına görə, tədbirin açılış mərasimində çıxış edən IFC-nin Azərbaycandakı daimi nümayəndəsi xanım Aliyə Əzimova qeyd edib ki, IFC-nin kiçik və orta müəssisələr üzrə apardığı araşdırmanın nəticələrinə əsasən, ölkənin biznes mühitində islahatların davam etdirilməsi biznes mühitinin təkmilləşdirilməsi istiqamətində görülən işlərin uğurla yekunlaşmasına əhəmiyyətli dərəcədə kömək edəcək.

«Azərbaycanda bu araşdırma ilk dəfə aparılıb və 1 800 sahibkar arasında aparılan araşdırma iqtisadiyyatın müxtəlif sahələrini əhatə edib», - deyən A.Əzimova onu da qeyd edib ki, Azərbaycanda özəl şirkətlərin sayının artırılması ölkənin qeyri-neft sektorunun inkişafına təkan verə bilər.

Tədbirdə çıxış edən və Azərbaycanda sahibkarlığın dövlət qeydiyyatı və sərhəd keçid məntəqələrində «bir pəncərə» sisteminin uğurla tətbiq edilməsindən danışan Azərbaycanın iqtisadi inkişaf nazirinin müavini Niyazi Səfərov qeyd edib ki, həmin sistemin tətbiqi ölkədə biznes mühitinin yaxşılaşdırılmasına təkan verəcək. Nazir müavini onu da bildirib ki, Azərbaycanda özəl sektorunun ÜDM-də payı 85%-ə, restoran və mehmanxana biznesi kimi özəl sektordakı payı 70-99% civarında, məşğulluğun payı 69%-ə, vergi daxilolmalarında özəl sektorun payı isə 71%-ə çatıb. Ölkənin iqtisadi inkişafından danışan N.Səfərov həmçinin İqtisadi İnkişaf Nazirliyi tərəfindən Azərbaycanın biznes mühiti üzrə monitorinqin aparılacağını bildirib.

Toplantıda çıxış edən İsveçrənin Azərbaycandakı səfiri Alan Quidetti bildirib ki, IFC ilə İsveçrənin İqtisadi Məsələlər üzrə Dövlət Katibliyi (SECO) biznes mühitinin təkmilləşdirilməsi layihələrini Azərbaycanla yanaşı Rusiya, Ukrayna, Özbəkisitan və Tacikistan kimi ölkələrdə də həyata keçirir: «Azərbaycanda vergi yoxlamalarının təkmilləşdirilməsi sahibkarlığın inkişafına əlavə stimul verəcək. Bu sahədə bir sıra islahatlar aparılacaq ki, biznes mühiti daha da inkişaf edəcək».

Tədbirdə çıxış edən Dünya Bankının Azərbaycandakı nümayəndəliyinin rəhbəri Qreqori Yedjeyçak Azərbaycanın iqtisadi inkişaf perspektivindən danışıb və qeyd edib ki, ölkədə qeyri-neft sektorunun inkişafına ciddi diqqət yetirilməlidir: «Azərbaycanın qeyri-neft sektorunda uzunmüddətli inkişaf perspektivləri mövcuddur və ölkə hökuməti neft sektoru ilə yanaşı qeyri-neft sektorunu inkişaf etdirməlidir ki, ölkədə davamlı inkişaf təmin olunsun».

Hesabata gəldikdə isə, təqdimatda Azərbaycanda biznes fəaliyyəti üçün ən çox maneə törədən proseduralar (icazə sənədləri, icbari sertifikatlaşdırma proseduraları, lisenziyanın alınması və s.), biznes qeydiyyatı və qeydiyyata dair tövsiyələr, bir çox yoxlamaların rəsmi olaraq qeydə alınmaması və digər məsələlər əksini tapıb. Təqdimat zamanı biznes sektorunun müəyyən olunan əsas çətinlikləri barədə müzakirələr aparılıb.

Qeyd edək ki, hesabat 2008-ci ilin əvvəlində bütün regionlar və iqtisadiyyatın əsas sektorlarını əhatə edən təqribən 1 800 kiçik və orta sahibkarlar arasında aparılan sorğu əsasında hazırlanıb və araşdırma zamanı hüquqi və institusional analiz aparılıb. Araşdırma və hesabatın əsas məqsədi tənzimləmə sahəsində sahibkarların qarşılaşdığı çətinlikləri azaltmaq, kiçik və orta sahibkarlıq sahəsində biznes mühitinin monitorinqini aparmaq və hesabatın paylanması vasitəsilə ictimaiyyətin əsas inkişaf məsələləri barədə məlumatını artırmaqdır.