Sahibkarlıq

Ana səhifə

Sahibkarlıq

Azərbaycan və İsrail müştərək fermer təsərrüfatı yaradacaq

30 iyun 2009 09:11 (UTC +04:00)

Bakı. Nicat Mustafayev – APA-Economics. Azərbaycanın iqtisadi inkişaf naziri Şahin Mustafayev Bakıda səfərdə olan İsrailin sənaye, ticarət və əmək naziri Binyamin Ben-Elizerin rəhbərlik etdiyi nümayəndə heyəti ilə görüşüb.

İqtisadi İnkişaf Nazirliyindən «APA-Economics»ə verilən məlumata görə, görüşdə Azərbaycanın iqtisadi inkişafından və aparılan islahatlardan danışan Ş.Mustafayev qeyd edib ki, Azərbaycanda özəl bölmənin inkişafına dövlət dəstəyi daha da gücləndirilib, əlverişli investisiya mühiti yaradılıb, sahibkarlıq iqtisadiyyatın aparıcı sahəsinə çevrilib. Azərbaycanda beynəlxalq əlaqələrin inkişafına xüsusi önəm verildiyini vurğulayan Ş.Mustafayev Azərbaycan və İsrail arasında əməkdaşlığın inkişaf etdirilməsi, ticarət-iqtisadi əlaqələrin genişləndirilməsi üçün işgüzar görüşlərin, biznes-forumların təşkilinin əhəmiyyətini qeyd edib.

Nazir həmçinin İsrail şirkətlərinin kənd təsərrüfatı sahəsində müasir texnologiyalara əsaslanan istehsal və emal müəssisələrinin yaradılması ilə bağlı qabaqcıl təcrübəyə malik olduğunu qeyd edib və Azərbaycan tərəfinin müasir aqrofermaların, logistik mərkəzlərin, həmçinin soyuducu anbarların və istixanaların yaradılmasında maraqlı olduğunu bildirmiş, İsrail iş adamlarını bu layihələrdə fəal iştiraka dəvət edib: «İsrail iş adamları, həmçinin Azərbaycan İnvestisiya Şirkəti ilə əməkdaşlığı genişləndirməklə qeyri-neft sektoruna, xüsusilə də kənd təsərrüfatı, informasiya-kommunikasiya texnologiyaları, səhiyyə və digər sahələrə investisiya yatıra bilər».

Öz növbəsində B.Ben-Elizer İsrailin Azərbaycanla iqtisadi əlaqələrinin genişlənməsində maraqlı olduğunu vurğulayıb, əməkdaşlığın inkişafı üçün İsrailin hər cür dəstək göstərməyə hazır olduğunu bildirib.

Görüşdə həmçinin Azərbaycanda İsrail texnologiyasına əsaslanan pilot fermer təsərrüfatının yaradılması layihəsi ilə bağlı müzakirə aparılıb və bu təsərrüfatın müştərək müəssisə formasında olması barədə ilkin razılıq əldə edilib. Tərəflər hər iki ölkənin marağını nəzərə alaraq, bu sahədə işlərin davam etdirilməsini məqsədəuyğun hesab edib.

Bundan başqa, B.Ben-Elizer Ş.Mustafayevi 2009-cu ilin noyabrında Təl-Əvivdə keçiriləcək aqrar sahədə texnologiyalara həsr olunmuş «Watech» beynəlxalq sərgi-konfransına dəvət edib.