Sahibkarlıq

Ana səhifə

Sahibkarlıq

Azərbaycanda bölgələrin inkişafı ilə bağlı növbəti seminar keçirilib

30 iyun 2009 12:13 (UTC +04:00)

Bakı. Nicat Mustafayev – APA-Economics. Bu gün Salyan rayonunda Azərbaycan İqtisadi İnkişaf Nazirliyinin təşkilatçılığı ilə «Azərbaycan regionlarının 2009-2013-cü illərdə sosial-iqtisadi inkişafı Dövlət Proqramı»na uyğun olaraq «Regionlarda sahibkarlığın inkişafına dövlət dəstəyi» mövzusunda tədbir keçirilib.

Nazirlikdən «APA-Economics»ə verilən məlumata görə, tədbirdə Salyan rayon İcra Hakimiyyətinin başçısı Rasim Bəşirov, İqtisadi İnkişaf Nazirliyinin sahibkarlığın inkişafı siyasəti şöbəsinin müdiri Zaur Qasımov, regionların inkişafı və dövlət proqramları şöbəsinin müdiri Sahib Məmmədov, eləcə də sahibkarlar çıxış edərək, Azərbaycanda özəl bölmənin inkişafı istiqamətində həyata keçirilən tədbirlərdən danışıb, sahibkarlığın inkişafının iqtisadi siyasətin əsas istiqamətlərindən olduğunu vurğulayıblar.

Tədbir çərçivəsində sahibkarlar üçün «Sahibkarlığa Kömək Milli Fondunun (SKMF) vəsaitləri hesabına güzəştli kreditlərin verilməsi üçün sahibkarlıq subyektləri tərəfindən təqdim edilən investisiya layihələrinin hazırlanması və qiymətləndirilməsi» mövzusunda treninq keçirilib. Treninqdə 250-ə yaxın sahibkar iştirak edib. Treninqdə investisiya layihələrinin hazırlanması, biznes-planların tərtib olunması və güzəştli kreditlərdən istifadə qaydaları barədə ətraflı məlumat verilib.

Tədbir çərçivəsində həmçinin Fondun vəsaitləri hesabına müvəkkil kredit təşkilatları vasitəsilə kənd təsərrüfatı məhsullarının istehsalı, saxlanması, həmçinin plastik kütlədən hazırlanan sənaye və tikinti materiallarının istehsalı üzrə Salyan və ətraf rayonlardan olan 75 sahibkara 3,7 mln. manat güzəştli kredit verilib. Ayrılmış güzəştli kreditlər hesabına həmin rayonlarda 250-dən artıq yeni iş yerinin açılması nəzərdə tutulur. Fonddan müvəkkil kredit təşkilatı vasitəsilə ayrılan 960 min manat güzəştli kredit hesabına «Salyan Plastik Kütlə Emalı» SC-də istehsal olunan polimer məhsulların çeşidi genişləndiriləcək, müxtəlif növ qapı və pəncərə PVC profillərinin (2, 3, 5 və daha çox kameralı) istehsal sahəsi yaradılacaq və müasir avadanlıqlarla təchiz ediləcək. İldə 2 500 ton PVC profilləri istehsal olunacaq müəssisədə 50 yeni iş yerinin açılması nəzərdə tutulur.

Tədbir çərçivəsində sahibkar Nizami Hüseynova 1,5 mln. manat güzəştli kredit ayrılıb. Bu vəsait Salyan rayonunun Çuxanlı kəndində inşa edilən kənd təsərrüfatı məhsullarının (pomidor, xiyar və üzüm) saxlanılması üçün ümumi sahəsi 2 250 kv. metr olan saxlama kamerasının (soyuducu anbarı) tikintisinin sürətləndirilməsinə, anbarın müasir soyuducu və avadanlıqlarla təmin olunmasına yönəldiləcək. Burada saxlanılacaq faraş kənd təsərrüfatı məhsullarının 60%-nin daxili, 40%-nin isə xarici bazarda satılması nəzərdə tutulur. Layihənin həyata keçirilməsi 70 yeni iş yerinin açılmasına imkan verəcək.

Beləliklə də, 2009-cu ilin ilk 6 ayı ərzində SKMF tərəfindən müvəkkil kredit təşkilatları vasitəsilə verilmiş kreditlərin həcmi 44,6 mln. manat təşkil edib. Bu müddət ərzində 770-dən çox sahibkar güzəştli kreditlər alıb. Güzəştli kreditlər hesabına maliyyələşdirilən layihələrin həyata keçirilməsi nəticəsində 3 400-ə yaxın yeni iş yerinin yaradılması gözlənilir.