Sahibkarlıq

Ana səhifə

Sahibkarlıq

Azərbaycan paytaxtında daha 817 kq istifadə müddəti bitmiş ərzaq məhsulları aşkarlanıb

02 iyul 2009 13:18 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti tərəfindən növbəti monitorinq keçirilib.

Nazirlikdən «APA-Economics»ə verilən məlumata görə, monitorinq zamanı Bakı şəhəri, Binəqədi rayonu fiziki şəxs T.Məmmədova, M.Rəhimova və hüquqi şəxs «Xəzər-99» firmasına məxsus topdansatış anbarlarında 817,32 kq istifadə müddəti ötmüş ərzaq məhsulları - kolbasa və qənnadı məmulatları, bitki yağları, sərinləşdirici içkilər, uşaq qidaları, konservləşdirilmiş tərəvəz məhsulları, quru çaylar və s. aşkar olunub, satışdan çıxarılaraq məhv edilib.

Bundan başqa, Nəsimi rayonunda «Vinni» mağazasında ümumi dəyəri 2,1 min manat olan 676 ədəd məcburi sertifikatlaşdırılmalı, lakin sertifikatlaşdırılmamış müxtəlif uşaq oyuncaqları, paltarları və ayaqqabıları aşkar olunub və satışdan çıxarılıb.

Qanunvericiliyin tələbini pozmuş 1 hüquqi və 3 fiziki şəxs barədə inzibati xəta haqqında protokol tərtib edilib və inzibati cərimələr tətbiq olunacaq.

Qeyd edək ki, ümumiyyətlə, cari ilin mayın 17-dən aparılmış nəzarət tədbirləri zamanı qanun pozuntusuna yol verdiyi müəyyən edilmiş 25 hüquqi şəxsə 96,5 min manat, 116 fiziki şəxsə 174,5 min manat cərimə tətbiq olunub.