Sahibkarlıq

Ana səhifə

Sahibkarlıq

Bakı və Gəncə şəhərlərində 200 kq-a yaxın yararsız ərzaq məhsulları aşkarlanıb

08 iyul 2009 14:21 (UTC +04:00)

Bakı. Rəşad Süleymanov – APA-Economics. Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidmətinin iyulun 7-də keçirdiyi monitorinqlər zamanı bir sıra ticarət obyektlərində keyfiyyətsiz məhsullar aşkarlanıb. Bu barədə «APA-Economics»ə İqtisadi İnkişaf Nazirliyinin mətbuat xidmətindən məlumat verilib.

Yoxlamalar zamanı Bakının Nəsimi rayonunda yerləşən «Nurgül market»də, Nərimanov rayonunda yerləşən «Apelsinçik market», «Hüseyn market», «Çinar market», Yasamal rayonunda «Meqa market» və Gəncə şəhərində Elçin Məmmədhəsənova məxsus ərzaq malları mağazasında ümumi çəkisi 200 kq-a yaxın istifadə müddəti ötmüş ərzaq məhsulları - kolbasa və qənnadı məmulatları, bitki yağları, konservləşdirilmiş tərəvəz məhsulları, süd və süd məhsulları, sərinləşdirici içkilər, həmçinin «Nutrinka malutka», «Malış», «Aquşha» uşaq yeməkləri aşkar olunub. Həmin məhsullar satışdan çıxarılaraq məhv edilib.

Qanun pozuntusuna yol vermiş 6 fiziki şəxs barədə inzibati xəta haqqında protokol tərtib edilib və inzibati cərimələr tətbiq olunacaq.

Qeyd edək ki, mayın 17-dən indiyədək aparılmış nəzarət tədbirləri zamanı qanun pozuntusuna yol verdiyi müəyyən edilmiş 29 hüquqi şəxsə 112,5 min manat, 148 fiziki şəxsə 222,5 min manat cərimə tətbiq olunub.