Sahibkarlıq

Ana səhifə

Sahibkarlıq

Ötən ay Bakıda ilkin bazara təklif olunmuş mənzillərin qiyməti 2,4% azalıb

10 iyul 2009 15:10 (UTC +04:00)

Bakı. Rəşad Süleymanov – APA-Economics. Cari ilin iyun ayında Bakı şəhəri üzrə ilkin bazara satış üçün təklif olunmuş mənzillərin orta qiyməti may ayı ilə müqayisədə 2,4% azalaraq 970 $/kv.metrdən 947 $/kv.metrə enib. Bu barədə «APA-Economics»ə «Əmlak Bazarı İştirakçıları» İctimai Birliyindən (ƏBİ) məlumat verilib.

Orta qiymətə uyğun olaraq qiymət indeksi də 8,9 bənd azalaraq 359,4 bəndində qərarlaşıb. Qiymət azalması ötən aylardan fərqli olaraq, qiyməti nisbətən baha olan binalarda qeydə alınıb. Bu isə iqtisadi böhrana baxmayaraq qiymətlərini stabil saxlamağa çalışan bəzi tikinti şirkətlərinin yay mövsümü ilə əlaqədar olaraq qiymət siyasətinə yenidən baxması nəticəsində qeydə alınıb.

İyun ayında ilkin bazar üzrə əvvəlki ayla müqayisədə Nərimanov (0,7%), Binəqədi (0,7) və Xətai (1,5%%) rayonlarında qiymət artımı qeydə alınıb. Qalan rayonlar üzrə müxtəlif qiymət azalması müşahidə edilib. Ən çox qiymət azalması isə Səbail (4,7%) və Nəsimi (3,9%) rayonlarında baş verib.

İpoteka kreditlərinin verilməsinə başlanması ayın əvvəllərində ilkin bazarda nisbi aktivlik yaratsa da, bu özünü qiymətlərdə və bağlanan əqdlərin dinamikasında göstərməyib. Ayın ikinci ongünlüyündən etibarən bazarda daha kəskin passiv tendensiya müşahidə olunub.

Araşdırmalar göstərir ki, ilkin bazarda qiymətlər 2007-ci ilin aprel ayında qeydə alınmış nəticəyə qədər azalıb.

Şəhər üzrə tikintisi aparılan binalarda orta mənzil sahəsi keçən aydakı nəticədən (1,1%) azalaraq 122,4 kv.m-ə enib. Orta blok göstəricisi 4,3% azalaraq 2,3 blok təşkil edib, orta mərtəbə göstəricisi isə may ayı ilə müqayisədə 0,6% azalaraq 15 mərtəbə təşkil edib.

İyun ayının sonuna Bakı şəhəri üzrə qeydə alınmış, tikintisi davam etdirilən yeni tikilililərin sayı 484 ədəd olub. Ay ərzində 2 binada son satış tamamlandığı üçün tikintisi aparılan binaların siyahısından çıxarılıb. Bu binalar Yasamal və Binəqədi rayonlarında qeydə alınıbdır. Daha 3 binada isə inşaat işləri tikinti şirkəti tərəfindən müvəqqəti olaraq dayandırılıb. İyunda daha 18 yeni binanın təməli qoyulub, 16 bina isə rüb ərzində monitorinq qrupunun siyahısına daxil edilib.