Sahibkarlıq

Ana səhifə

Sahibkarlıq

Cari ilin I yarısında Azərbaycanda sosial sahələrinin inkişafı üçün əsas kapitala 3374,9 mln. manat həcmində investisiya yatırılıb

17 iyul 2009 12:18 (UTC +04:00)

Bakı. Elnur Hüseynquluyev – APA-Economics. Cari ilin birinci yarısında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 3374,9 mln. manat həcmində investisiya yönəldilib. Dövlət Statistika Komitəsindən «APA-Economics»ə verilən məlumata görə, dövlət mülkiyyətinə məxsus müəssisə və təşkilatlar əsas kapitala 2172,1 mln. manat və ya ümumi investisiyanın 64,4%-i, qeyri-dövlət müəssisələri 1202,8 mln. manat və ya 35,6%-i qədər sərmayə qoyub. Tikinti-quraşdırma işlərində istifadə edilmiş investisiyanın həcmi əvvəlki ilin müvafiq dövrü ilə müqayisədə 5,3% artaraq 2345,2 mln. manat olub. İstehsal təyinatlı obyektlərin inşasında 2674,2 mln. manat, qeyri-istehsal təyinatlı obyektlərin tikintisində 700,7 milyon manatlıq investisiyadan istifadə edilib.

Cari ilin ilk altı ayında əsas kapitala yönəldilmiş investisiyaların 82,4%-i daxili investisiyalar, 17,6%-ni isə xarici investisiyalar təşkil edib. Daxili investisiya əvvəlki ilin müvafiq dövrünün səviyyəsini 11,6% üstələyib. Əsas kapitala yönəldilmiş daxili investisiyanın 74,8%-i dövlət mülkiyyətinə məxsus müəssisə və təşkilatların, 25,2%-i qeyri-dövlət mülkiyyətinə məxsus müəssisələrin payına düşür. 2009-cu ildə büdcədən maliyyələşdirilməsi nəzərdə tutulmuş inşaat işlərini həyata keçirmək üçün dövlət büdcəsində 4,718 mln. manat vəsait nəzərdə tutulub. İlin birinci yarısında bu vəsaitin 1276,8 mln. manatı istifadə edilib. Əsas kapitala yönəldilmiş sərmayənin ümumi həcmində müəssisə və təşkilatların vəsaitləri 1532,3 mln. manat (ümumi investisiyanın 45,4%-ii), bank kreditləri 137,3 mln. manat (4,1%-i), büdcə vəsaitləri 1368,9 mln. manat (40,6%-i), büdcədənkənar fondların vəsaitləri 224,1 mln. manat (6,6%), əhalinin şəxsi vəsaitləri 112,1 mln. manat (3,3%), digər vəsaitlər isə 0,2 mln. manat təşkil edib.

İlk altı ay ərzində əsas kapitala yönəldilmiş bütün investisiyanın 40.8%-i sənaye sahələrinin inkişafına, 3,6%-i kənd təsərrüfatına, 0,8%-i faizi tikintiyə, 2,9%-i ticarət və xidmətə, 0,1%-i mehmanxana və restoranlara, 29,7%-i nəqliyyata, 1,2%-i rabitəyə, 0,2%-i maliyyəyə, 9,6%-i daşınmaz əmlakla əlaqədar əməliyyatlara (ondan 7,3%-i mənzil tikintisinə), 4,4%-i dövlət idarəetməsinə, 1,3%-i təhsilə, 1,8%-i səhiyyəyə, 3,6%-i digər kommunal, sosial və şəxsi xidmətlərin göstərilməsi sahələrinə sərf olunub.

İlin ötən altı ayı ərzində əsas kapitala yönəldilmiş ümumi investisiyanın 2415,2 mln. manatı (71,6%) qeyri-neft bölməsinin, 959,7 mln. manatı (28,4%) neft bölməsinin inkişafına istifadə edilib. Əvvəlki ilin müvafiq dövrü ilə müqayisədə qeyri-neft bölməsinə yönəldilmiş investisiyanın həcmi 8,2% çox olub.

Bu ilin birinci yarısında Gədəbəy Qızıl-mis emalı zavodu, Bakı şəhərində Beynəlxalq Avtovağzal Kompleksi, ölkənin müxtəlif bölgələrində 163,3 kilometr uzunluğunda fiber-optik magistral kabel xətti və 25,9 min nömrəlik avtomat telefon stansiyaları, bütün maliyyə mənbələri hesabına ümumi sahəsi 510,3 min kvadrat metr olan yeni yaşayış evləri, 288 şagird yerlik ümumtəhsil məktəbi, 90 yerlik məktəbəqədər uşaq müəssisəsi, 35 çarpayılıq xəstəxana, növbədə 90 nəfəri qəbul edən ambulatoriya-poliklinika müəssisəsi, 140 yerlik klub, Şəmkir Olimpiya İdman Kompleksi, Bakı şəhərində Azərbaycan Tennis Akademiyası və Elmi Tədqiqat Göz Xəstəlikləri İnstitutu, Bərdə rayonunda Müalicə Diaqnostika Mərkəzi istifadəyə verilib.